Çmimet e naftës në tregjet ndërkombëtare shënuan rënie të hënën, duke u tërhequr nga nivelet më të larta të gati gjashtë muajve.
Lëvizja vjen në një kohë kur përpjekjet diplomatike për uljen e tensioneve mes Shteteve të Bashkuara dhe Iranit kanë zbutur shqetësimet për furnizimin me energji, ndërsa sulmet në Arabinë Saudite vijojnë të mbajnë tregjet në gatishmëri.
Kontratat e së ardhmes për naftën Brent ranë me 2.21 dollarë, ose 1.89%, duke zbritur në 114.51 dollarë për fuçi. Ndërkohë, nafta amerikane West Texas Intermediate (WTI) u ul me 2.23 dollarë, ose 2.16%, në 101.04 dollarë për fuçi, sipas të dhënave të raportuara nga Reuters.
Pavarësisht rënies të së hënës, të dy treguesit e naftës kishin regjistruar rritje gjatë javës së kaluar. Brent u rrit me 6%, ndërsa WTI shënoi një fitim prej 2.3%, të nxitura kryesisht nga shqetësimet për ndërprerje të mundshme të furnizimit nga Lindja e Mesme.
Tregjet vijojnë të ndjekin nga afër zhvillimet në Arabinë Saudite, pasi rebelët Houthi njoftuan gjatë fundjavës se kishin sulmuar aeroportin e Riadit dhe objekte të industrisë së naftës. Autoritetet saudite deklaruan se kishin kapur raketa dhe dronë të tjerë, pas incidenteve që kishin shkaktuar dëme dhe ndërprerje në aktivitetin e aeroportit kryesor të vendit.
Paralelisht, përpjekjet diplomatike për uljen e tensioneve vijuan. Ndërmjetësues nga Katari udhëtuan drejt Teheranit të dielën, në kuadër të përpjekjeve për deeskalim, në koordinim me Shtetet e Bashkuara.
