Franca dislokoi të shtunën 70.000 policë dhe xhandarë në të gjithë vendin, ndërsa protestat masive rifilluan një javë pas trazirave të dhunshme, plaçkitjeve të përhapura dhe sulmeve ndaj forcave të sigurisë. Deri në orët e para të pasdites, 135 persona ishin arrestuar, ndërsa policia përdori gaz lotsjellës kundër demonstruesve në Lion. Protesta kryesore në Paris fillimisht mbeti paqësore, megjithëse kryeqyteti ishte vendosur nën masa të jashtëzakonshme sigurie.
Ministri i Brendshëm francez, Laurent Nuñez, paralajmëroi përpara demonstratave se forcat e sigurisë do të duhej të reagonin me shpejtësi ndaj çdo rikthimi të dhunës. Ai iu referua thirrjeve për të shkaktuar trazira nga grupe politike dhe elementë kriminalë, duke paralajmëruar se do të ishte një ditë e gjatë. Autoritetet dislokuan 10.000 efektivë më shumë se gjatë trazirave të së shtunës së kaluar, duke përforcuar forcat e zakonshme të policisë me njësi të specializuara dhe xhandarë shtesë.
Parisi ngjante me një qytet nën shtetrrethim. Tregtarët mbuluan vitrinat me dërrasa për të parandaluar një valë tjetër plaçkitjesh, ndërsa institucione të rëndësishme kulturore, përfshirë Luvrin, Muzeun e Orsay-së dhe Operën e Parisit, qëndruan të mbyllura. Më shumë se 20 stacione metroje u mbyllën, ndërsa shoqatat e biznesit u bënë thirrje tregtarëve t’i mbanin dyqanet të mbyllura si masë paraprake.
«Pothuajse nuk ka fare njerëz që bëjnë pazar, ndaj nuk ia vlen vërtet të qëndrojmë hapur», tha Oscar, menaxher i një dyqani veshjesh të markës Kiton në Paris. Edhe turistët shprehën pakënaqësi për mbylljet. «Gjithçka është e mbuluar me dërrasa. Nuk jemi të sigurt se ku të shkojmë», tha një vizitor nga Nju Orleansi.
Itinerari i protestës kryesore në Paris u përcaktua vetëm pas një mosmarrëveshjeje ligjore. Policia u kishte kërkuar organizatorëve ta zhvendosnin marshimin larg zonave tregtare qendrore, duke argumentuar se itinerari fillestar kalonte nëpër zona që ishin dëmtuar rëndë gjatë trazirave të fundjavës së kaluar. Udhëheqësit e së majtës akuzuan autoritetet se po krijonin qëllimisht konfuzion për të dekurajuar pjesëmarrjen. Në fund, një gjykatë la në fuqi kufizimet.
Demonstruesit kritikuan reagimin e ashpër të qeverisë dhe dislokimin e forcave të sigurisë përgjatë bulevardit Champs-Élysées.
«Ne derdhim lot për dyqanet, por jo për njerëzit që po varfërohen gjatë gjithë vitit», tha Clara, një studente 22-vjeçare e artit. «Unë dhe shoqja ime pothuajse nuk erdhëm fare, sepse kishim frikë. Por në fund erdhëm, sepse është e rëndësishme të mos lejojmë që represioni të fitojë.»
Trazirat e fundjavës së kaluar nisën në mes të demonstratave të mëdha kundër rritjes së kostos së jetesës dhe përkeqësimit të kushteve në institucionet arsimore. Më pas, dhuna u përhap në Paris, Marsejë, Lion, Nicë, Nantë, Limoges dhe qytete të tjera. Pjesëmarrësit në trazira sulmuan policinë, hodhën gurë, u vunë zjarrin automjeteve dhe ndërtesave, si dhe dëmtuan ose plaçkitën rreth 3.000 biznese.
Më shumë se 2.700 persona u arrestuan dhe gati 1.000 efektivë policie u plagosën, disa prej tyre rëndë. Presidenti Emmanuel Macron dhe kryeministri Sébastien Lecornu pranuan se kishte pasur dështime në punën e inteligjencës dhe në përgatitjet e sigurisë, të cilat e kishin lënë policinë në vështirësi për të vënë nën kontroll dhunën.
Tensione të ngjashme përfshinë edhe Italinë, ku autoritetet dislokuan 500 ushtarë shtesë në Milano pas plaçkitjeve dhe përplasjeve me policinë gjatë fundjavës së kaluar. Përforcimet iu bashkuan qindra ushtarëve që ndodheshin tashmë në qytet, ndërsa autoritetet shqetësohen se protestuesit mund të zhvendosen drejt lagjeve përtej qendrës së qytetit, e cila ruhet me masa të forta sigurie.
Dyqanet luksoze në zonën e modës në Milano, përfshirë ato të markave Omega, Tiffany dhe Gucci, mbuluan vitrinat me dërrasa druri. Policia tha se rreth 2.000 protestues të rinj kishin marrë pjesë në aktet e dhunës gjatë fundjavës së kaluar. Masat e sigurisë u përforcuan edhe në Romë, ku autoritetet kufizuan hyrjen në rrugët e mbushura me dyqane luksoze, ndërsa demonstratat vazhdonin, shkruan Ynet.
Në të dyja vendet, autoritetet po përpiqen të parandalojnë përsëritjen e shkatërrimeve të fundjavës së kaluar, ndërsa protestuesit vazhdojnë të shprehin zemërimin për vështirësitë ekonomike, pabarazinë dhe politikat qeveritare.
