Një peshkatar me origjinë shqiptare është shpallur fajtor nga drejtësia britanike, pasi u kap duke tentuar të transportonte ilegalisht 17 emigrantë nga Franca drejt Mbretërisë së Bashkuar përmes një jahti.
Sipas njoftimit nga Agjencia Kombëtare e Krimit në Britani (NCA), peshkatari Eno Gajda u arrestua nga oficerët e Komandës së Sigurisë Kufitare në brigjet e Dorset, ndërsa çështja u mor në dorëzim nga hetuesit e NCA-së.
Gajda kishte lundruar me një mjet lundrues të llojit jaht nga Dielette e Francës me destinacion bregdetin e Portlandit në Britani.
Mjeti u pikas nga roja bregdetare dhe u shoqërua në portin e Portland Marina. Gjatë kontrollit të ushtruar në bord, oficerët gjetën 17 emigrantë të paligjshëm, të gjithë me kombësi shqiptare.
I akuzuar për lehtësim të emigracionit të paligjshëm, Eno Gajda u deklarua fajtor në Gjykatën e Kurorës në Bournemouth. Masa e dënimit për të pritet të jepet më 18 nëntor në të njëjtën gjykatë.
Drejtuesi i njërës prej degëve të NCA-së, Andy Tickner, e cilësoi këtë tentativë si një veprim me rrezikshmëri të lartë për jetën e njerëzve:
“Edhe pse Gajda kishte njëfarë përvoje në det, lundrimi nëpër një nga korsitë më të ngarkuara të transportit detar në botë ishte shumë i rrezikshëm dhe vinte në rrezik shumë jetë”, u shpreh Tickner.
