Një peshkatar shqiptar 58-vjeçar është shpallur fajtor në Mbretërinë e Bashkuar, pasi tentoi të transportonte 17 emigrantë nga Franca drejt brigjeve britanike me një jaht. Eno Gajda u arrestua më 27 gusht në brigjet e Dorset dhe më 26 tetor pranoi fajësinë për lehtësimin e emigracionit të paligjshëm në Gjykatën e Kurorës në Bournemouth.

Sipas Agjencisë Kombëtare të Krimit në Britani (NCA), Gajda ishte nisur me një jaht 40 këmbë të gjatë nga Dielette, në Francë, me destinacion zonën bregdetare pranë Portlandit. Mjeti lundrues u pikas dhe u ndalua nga oficerët e Komandës së Sigurisë Kufitare, të cilët e shoqëruan drejt portit të Portland Marina.

Në bord ndodheshin 17 persona, mes tyre 16 burra shqiptarë dhe një i mitur mashkull, të cilët u zbritën në port. Pas arrestimit, çështja u mor në hetim nga Agjencia Kombëtare e Krimit, ndërsa Gajda pritet të marrë dënimin më 18 nëntor, në të njëjtën gjykatë.

Andy Tickner, drejtues i një prej degëve të NCA-së, e cilësoi udhëtimin veçanërisht të rrezikshëm, duke theksuar se transportimi i emigrantëve përmes një prej korridoreve detare më të ngarkuara në botë vuri në rrezik jetën e personave në bord.

Edhe Charlie Eastaugh, drejtor për çështjet detare dhe mjetet e vogla lundruese në Komandën e Sigurisë Kufitare, deklaroi se autoritetet do të vazhdojnë bashkëpunimin për të goditur rrjetet e kontrabandës së emigrantëve.

Sipas NCA-së, lufta kundër krimit të organizuar të lidhur me emigracionin mbetet një nga përparësitë e agjencisë. Aktualisht, ajo ka më shumë se 100 hetime aktive ndaj individëve ose rrjeteve që dyshohen për përfshirje në kontrabandën e emigrantëve.