Microsoft njoftoi të hënën se do t’u ofrojë paketa largimi vullnetar rreth 60,000 punonjësve, ose më shumë se një të katërtës së fuqisë së saj punëtore globale, ndërsa gjiganti i teknologjisë kërkon të kufizojë kostot dhe të sigurojë financimin për investimet e tij masive në inteligjencën artificiale (IA).
Punonjësit në të gjithë kompaninë që zhvillon sistemin operativ Windows do të kenë të drejtë të përfitojnë nga këto oferta. Këtu përfshihen edhe ata që punojnë në fushat e produkteve të IA-së, Copilot, financave, burimeve njerëzore, Xbox dhe Windows + Devices, tha për Reuters një burim i njohur me çështjen, i cili kërkoi të mbetej anonim, pasi informacioni ishte konfidencial. Njësi të tilla si marketingu, biznesi tregtar dhe siguria do të përjashtohen nga programi, shtoi burimi.
“Ky program u jep punonjësve të kualifikuar, të cilët mund të jenë duke shqyrtuar mundësinë për të vazhduar karrierën jashtë kompanisë, një alternativë të re për ta bërë këtë kalim tani, me mbështetjen tonë. Ai u jep gjithashtu organizatave pjesëmarrëse një mënyrë tjetër për ta përshtatur fuqinë punëtore me nevojat në ndryshim”, tha Amy Coleman, drejtoreshë e burimeve njerëzore të kompanisë, në një memorandum drejtuar stafit.
Ashtu si gjigantët e tjerë të teknologjisë, Microsoft po shpenzon qindra miliarda dollarë për qendra të të dhënave të inteligjencës artificiale dhe çipa, duke tërhequr vëmendjen dhe shqyrtimin e investitorëve lidhur me pyetjen nëse përfitimet financiare do t’i justifikojnë kostot marramendëse.
Kompania, e cila pritet të publikojë rezultatet financiare për tremujorin e parë pas mbylljes së tregjeve të mërkurën, ka parashikuar shpenzime kapitale prej 175 miliardë dollarësh për vitin kalendarik 2026.
Sipas raportit vjetor të kompanisë, më 30 qershor 2026, Microsoft kishte gjithsej 223,000 punonjës me kohë të plotë në mbarë botën.
Aksionet e Microsoft, të cilat janë rritur rreth 10% që nga fillimi i këtij viti, u rritën afërsisht 1% të hënën. Lajmi u raportua fillimisht nga Business Insider.
Në fillim të këtij viti, kompania u kishte ofruar paketa largimi vullnetar rreth 7% të fuqisë së saj punëtore në SHBA, ose afërsisht 9,000 punonjësve.
Në korrik, Microsoft njoftoi se do të shkurtonte 4,800 vende pune, ose rreth 2.1% të fuqisë së saj punëtore globale. Ky ristrukturim përfshinte riorganizimin e biznesit të lojërave Xbox dhe shitjen e deri në pesë studiove të zhvillimit të lojërave, ndërsa kompania synonte të rriste kthimin nga investimet pas vitesh shpenzimesh të mëdha në këtë sektor.
“Ky program do të jetë i disponueshëm për punonjësit e kualifikuar në ekipet pjesëmarrëse në Kanada, Indi, Mbretërinë e Bashkuar dhe Shtetet e Bashkuara, të cilët janë në nivelin 70 ose më poshtë”, deklaroi Microsoft të hënën.
Kompania tha se bëhej fjalë për një program vullnetar, të disponueshëm vetëm për një periudhë të kufizuar, i cili mbështetej në përvojën e fituar nga një program i mëparshëm i pensionimit vullnetar. Punonjësit që plotësojnë kriteret do të marrin hollësitë e programit brenda disa orëve të ardhshme, shtoi kompania.
