Këngëtarja Dafina Zeqiri ka reaguar sërish pas vrasjes së Arlinda Sylaj-Zekajt në Kosovë, duke zbuluar se pas qëndrimit të saj publik ka marrë mesazhe nga gra që pretendojnë se kanë denoncuar dhunën në familje, por nuk kanë gjetur mbështetjen e nevojshme nga institucionet.

Përmes një postimi në rrjetet sociale, artistja tregoi se shumë gra i kanë shkruar privatisht për t’i rrëfyer përvojat e tyre, ndërsa disa prej tyre i kanë dërguar edhe dokumente që lidhen me denoncimet e bëra në Policinë e Kosovës.

Sipas mesazheve që ajo thotë se ka marrë, disa gra janë drejtuar disa herë në polici për të raportuar dhunë fizike dhe abuzim nga partnerët, por pretendojnë se nuk kanë marrë ndihmën që prisnin.

Dafina e cilësoi këtë situatë si të papranueshme, duke kërkuar nga institucionet përgjegjëse që çdo denoncim të trajtohet me seriozitet dhe përgjegjshmëri, veçanërisht kur bëhet fjalë për sigurinë dhe jetën e qytetarëve.

Këngëtarja kundërshtoi gjithashtu perceptimin se dhuna në familje është një çështje private që duhet të mbetet brenda mureve të shtëpisë. Sipas saj, raste të tilla nuk mund të justifikohen si probleme personale, pasi përbëjnë akte dhune që kërkojnë ndërhyrje dhe trajtim serioz nga autoritetet.

Përtej përgjegjësisë institucionale, artistja vuri theksin edhe te edukimi i djemve që në fëmijëri, duke nënvizuar rëndësinë e mësimit të respektit ndaj grave që në familje.

Si nënë e një djali dhe në pritje të një fëmije tjetër, Dafina e cilësoi këtë një përgjegjësi të rëndësishme dhe bëri thirrje që fëmijët të rriten me vlera që promovojnë respektin, dashurinë dhe dinjitetin.

Reagimi i saj vjen në një kohë kur rasti i Arlinda Sylaj-Zekajt ka rikthyer në vëmendje çështjen e dhunës ndaj grave dhe përgjegjësinë e institucioneve për të ndërhyrë në kohë ndaj denoncimeve dhe kërcënimeve.