Senatori brazilian i së djathtës, Flavio Bolsonaro, ka ndjekur shembullin e babait të tij të burgosur, duke refuzuar të pranojë humbjen përballë presidentit të majtë Luiz Inácio Lula da Silva, i cili fitoi një mandat të katërt historik në zgjedhjet presidenciale të së dielës, shkruan Reuters.
Bolsonaro, djali i ish-presidentit Jair Bolsonaro, vuri në pikëpyetje një vendim të marrë të dielën në mbrëmje nga një gjyqtar i Gjykatës së Lartë, i emëruar nga Lula, i cili zgjati votimin me dy orë për shkak të parregullsive të pretenduara në transportin publik. Senatori tha se do të kërkonte anulimin e rezultatit.
“Është e pamundur të njihen rezultatet e zgjedhjeve, duke pasur parasysh rrethanat në të cilat u zhvilluan ngjarjet”, u tha Bolsonaro gazetarëve.
Ndërsa kandidati u përgatit të kundërshtonte rezultatin, udhëheqësit botërorë u rreshtuan shpejt në mbështetje të fitores së Lula-s. Urimet erdhën nga Bashkimi Evropian, Meksika, Franca, Kanadaja, India dhe Rusia.
Presidentët e sapozgjedhur të krahut të djathtë në Kolumbi, Peru dhe Kili iu bashkuan udhëheqësve që njohën rezultatet e së dielës, ndërsa administrata Trump mbeti në heshtje.
Investitorët, të befasuar nga rikthimi i Lula-s, i cili sfidoi rezultatet e sondazheve private, goditën tregun brazilian të aksioneve, kursin e këmbimit dhe borxhin publik, ndërsa tregjet rivlerësuan perspektivën fiskale të vendit nën drejtimin e tij.
Përmasat e humbjes së Bolsonaro-s, me senatorin që mbeti më shumë se 4 milionë vota pas Lula-s, e bëjnë të pamundur suksesin e përpjekjeve të tij për anulimin e votimit, thanë analistët.
Sipas një analize të të dhënave zgjedhore nga Pedro Burgos, profesor në institutin Insper, më pak se 35.000 vota, ose rreth 0,03% e totalit, u hodhën gjatë dy orëve shtesë të votimit të urdhëruara nga Gjykata e Lartë.
Kërkesa e Bolsonaro-s dobësohet gjithashtu nga fakti se edhe fushata e tij kishte kërkuar zgjatjen e votimit për shkak të reshjeve të dendura në jugun konservator të vendit.
Megjithatë, vëzhguesit paralajmërojnë se refuzimi i senatorit për të pranuar humbjen mund të nxisë protesta në një vend ku besimi te sistemi zgjedhor dhe pavarësia e gjyqësorit është vënë në sprovë vitet e fundit.
Jair Bolsonaro e zhyti Brazilin në një krizë të thellë demokratike pas zgjedhjeve të vitit 2022, kur mbështetësit e tij sulmuan ndërtesat qeveritare për të protestuar kundër rezultatit. Më vonë, ai u dënua me 27 vjet burg për komplotimin e një grushti shteti.
