Pritja e Machado-s nga turma njerëzish pas kthimit në Venezuelë, Rubio: Me demonstrata në rrugë, nuk arrihet demokracia

Një ditë pas kthimit triumfues në Karakas të udhëheqëses së opozitës venezueliane në mërgim, Maria Corina Machado, Sekretari i Shtetit i SHBA-së, Marco Rubio, paralajmëroi në mënyrë të nënkuptuar kundër ndërhyrjes së saj në tranzicionin e brishtë demokratik të vendit.

“Me demonstrata në rrugë, nuk arrihet demokracia”, u tha Rubio gazetarëve, megjithatë, pa e përmendur me emër Machado-s.

Kritikat e saj për një marrëveshje të madhe nafte që SHBA-të përfunduan me regjimin aktual të Karakasit nën drejtimin e Delcy Rodriguez, dhe aspiratat e saj presidenciale , i kanë vënë zyrtarët e administratës Trump në gatishmëri pas kthimit të saj të papritur.

“Rubio është në një akrobaci politike ”, tha një burim i Shtëpisë së Bardhë për Axios.

“Venezuela është arritja më e madhe e politikës së jashtme të kësaj administrate dhe nëse progresi që kemi bërë përmbyset dhe Machado vepron si një shpërqendrim, askush nuk fiton”, shtoi ai.

Si Machado ashtu edhe qeveria amerikane bien dakord që zgjedhjet duhet të mbahen në Venezuelë. Megjithatë, udhëheqësi i opozitës ka bërë thirrje që ato të mbahen në vitin 2027, ndërsa zyrtarët amerikanë mbeten të kujdesshëm, duke përmendur tre kushte:

Ristrukturimi i Gjykatës Supreme të Venezuelës, e cila sipas Uashingtonit është aktualisht e mbushur me besnikë të regjimit të vjetër të Maduros, me qëllim emërimin e anëtarëve të rinj deri në fund të këtij viti.

Reformimi i Këshillit Kombëtar Zgjedhor të vendit, i cili besohet gjithashtu se dominohet nga elementë të administratës së vjetër. Departamenti i Shtetit synon të formojë një këshill të ri deri në fillim të vitit të ardhshëm.

Zgjidhja e problemit të borxhit të Venezuelës . Vendi përballet me një nga problemet më të mëdha të borxhit sovran në botë, 300 miliardë dollarë, më shumë se PBB-ja e tij. Në rastin e borxhit, afati kohor është më pak i qartë.