Kamberi: Pasivizimi na kushtoi mandatin e tretë
Kryetari i listës së Koalicionit Shqiptar në zgjedhjet parlamentare në Serbi, Shaip Kamberi, ka deklaruar se shqiptarët synojnë të sigurojnë dy mandate në Kuvendin e Serbisë, ndërsa ka akuzuar autoritetet për diskriminim sistematik përmes pasivizimit të adresave.
Në një lidhje të drejtpërdrejtë për RTK-në, pak para mbylljes së vendvotimeve, Kamberi bëri të ditur se, sipas të dhënave paraprake të orës 19:00, në 37 vendvotime në Preshevë kishin votuar 16.600 qytetarë. Ndërkohë, në vendvotimet shqiptare në Bujanoc, numri i votuesve kishte arritur në 10.853.
Ai vlerësoi se procesi zgjedhor kishte vijuar përgjithësisht në mënyrë të rregullt, megjithëse në orët e para ishin evidentuar disa parregullsi të vogla.
Sa i përket mundësisë për të siguruar mandatin e dytë, Kamberi theksoi se rezultati do të varet edhe nga pjesëmarrja e përgjithshme në zgjedhje.
“Nëse shkon në 70%, siç po flitet, atëherë sigurisht do të kërkohen më tepër vota. Në rast të një rezultati 61–65%, kemi gjasa shumë reale ta kemi ulësen e dytë”, deklaroi ai.
Kamberi e cilësoi pasivizimin e adresave si një nga faktorët që kanë dëmtuar përfaqësimin politik të shqiptarëve në Serbi. Sipas tij, personat e prekur nga ky proces janë hequr edhe nga regjistrat e votuesve, duke kufizuar mundësinë e tyre për të marrë pjesë në zgjedhje.
“Kjo na ka sjellë në situatë që ne ta humbim mandatin e tretë që e kemi pretenduar”, u shpreh Kamberi, duke e cilësuar këtë praktikë si pjesë të diskriminimit sistematik ndaj shqiptarëve në Luginën e Preshevës.
Ai përmendi veçanërisht Medvegjën, ku, sipas tij, pasivizimi i adresave ka ndikuar drejtpërdrejt në rezultatet zgjedhore dhe në mundësitë e shqiptarëve për të siguruar përfaqësim politik.
Në përfundim, Kamberi vlerësoi mobilizimin e votuesve shqiptarë dhe falënderoi qytetarët që kishin ardhur nga Kosova për të ushtruar të drejtën e votës.
“Ditët e fundit të fushatës zgjedhore patëm reagime nga të gjitha anët e hapësirave shqiptare, që ishte një motivim shtesë për zgjedhësit tanë”, përfundoi ai.
360grade.al
