Për shumë nga banorët e qarkut të Korçës, udhëtimi drejt qytetit fqinj grek të Kosturit është kthyer në rutinë bazuar në një llogari të ftohtë ekonomike.
Çmimet më të lira të ushqimeve dhe karburantit në vend po i shtyjnë çdo ditë e më shumë qytetarët të kalojnë kufirin. Drejtuesit e mjeteve dhe qytetarët që udhëtojnë shpesh tregojnë se llogaria del fitimprurëse pasi ata arrijnë të kursejnë thuajse 20 %.
Por ajo që e bën këtë fenomen edhe më të gjerë janë agjencitë e udhëtimit, të cilat organizojnë linja të posaçme, duke u lënë kohën e duhur udhëtarëve për të mbushur bagazhet në supermarketet greke.
“Nga sa shoh unë, çdo herë është plot. Sot më thanë se kishin ardhur edhe autobusë. Dy, tre, katër. Në mëngjes dy a tre, por tani prisnin edhe dy të tjerë. Pra, vijnë shpesh”.
Por si del llogaria e saktë matematikore në të dyja anët e kufirit?
“Për ta verifikuar këtë fakt ne bëmë një test me çmimet e disa artikujve të njëjtë ushqimorë në dy vendet”.
Shporta ushqimore prej 12 artikujsh bazë, në supermarketet greke kushtoi 1,567 lekë kundrejt 1,714 lekëve që kushton në Shqipëri pra 8.5% më e lirë. Diferencat më të mëdha ndihen tek gjalpi, pula e freskët, vaji dhe frutat, informon Top Channel.
Më tej krahasimi i drejtpërdrejtë i të njëjtës markë karburanti tregon se nafta standarde në Shqipëri tregtohet 213 lekë litri, ndërsa në Kostur kushton 2,059 euro (ose 186.8 lekë), pra 12.3% më e lirë.
Për përdoruesit e naftës dhe blerësit e vëmendshëm blerjet në vendin fqinjë mbeten një mundësi kursim dhe Kosturi është shndërruar në alternativën më të afërt për të sfiduar çmimet e kripura në tregun e brendshëm.
