Plagosja në sy e Erjon Vishkullit gjatë protestës, AMP dhe Prokuroria nisin hetimet! Pezullohet edhe efektivi i “Shqiponjave” që dhunoi burrin e rrëzuar në tokë
Policia e Shtetit ka reaguar zyrtarisht pas protestës masive të studentëve dhe të rinjve të zhvilluar më 24 tetor në Tiranë, duke u ndalur te plagosja në sy e 28-vjeçarit Erjon Vishkulli dhe denoncimet për dhunë nga efektivët e policisë.
Në reagimin e saj, Policia bën të ditur se Drejtori i Përgjithshëm, Skënder Hita, ka urdhëruar nisjen e menjëhershme të hetimeve nga Drejtoria e Standardeve Profesionale për të zbardhur rrethanat në të cilat i riu pësoi dëmtimin e rëndë në sy.
Për këtë incident kanë nisur hetimet edhe Agjencia e Mbikëqyrjes Policore dhe Prokuroria, me qëllim dokumentimin e plotë ligjor të ngjarjes dhe përcaktimin e përgjegjësive.
Policia e Shtetit ka shprehur keqardhjen për plagosjen e 28-vjeçarit, duke i uruar shërim të shpejtë atij, si dhe qytetarëve, gazetarëve dhe punonjësve të policisë që mbetën të lënduar gjatë protestave në kryeqytet.
Ndërkohë, një tjetër rast i denoncuar në News24 mbrëmë ka sjellë pezullimin nga detyra të një efektivi të Forcës së Posaçme “Shqiponja”.
Bëhet fjalë për inspektorin A. K., i cili, sipas njoftimit të Policisë, është shfaqur duke tejkaluar kompetencat dhe duke mos respektuar parimin e proporcionalitetit gjatë ushtrimit të detyrës.
360grade.al
