Bankat godasin bursat europiane, HSBC humbet gati 7%; kriza franceze rëndon tregjet

Bursat europiane e nisën tregtimin e së martës në rënie, të goditura nga rezultatet zhgënjyese të HSBC dhe përshkallëzimi i tensioneve sociale në Francë, ekonominë e dytë më të madhe të Eurozonës.

Indeksi paneuropian STOXX 600 ra me 0.2%, në 639.64 pikë, në orët e para të tregtimit, duke ndërprerë rimëkëmbjen e një dite më parë, kur kishte fituar gati 0.8%.

Aksionet e HSBC, bankës më të madhe europiane, humbën 6.9%, pasi të ardhurat rezultuan nën pritshmëritë e analistëve, pjesërisht për shkak të ngadalësimit të aktivitetit të administrimit të pasurisë. Rënia e HSBC ushtroi presion mbi të gjithë sektorin bankar europian, indeksi i të cilit humbi 1.3%.

Sipas Reuters, investitorët mbeten të shqetësuar edhe nga zhvillimet në Francë, ku drejtuesit e protestave studentore janë zotuar të vazhdojnë demonstratat, pavarësisht lëshimeve të qeverisë në sektorin e arsimit. Lëvizja po tërheq gjithnjë e më shumë sindikatat dhe grupe të tjera, duke zgjeruar pasojat ekonomike të trazirave.

Aksionet franceze kishin humbur mbi 2% gjatë javës së kaluar, ndërsa protestat dhe pasiguria politike goditën besimin e investitorëve.

Presioni mbi tregjet po shtohet edhe nga gjendja e financave publike franceze. Borxhi publik po i afrohet 120% të Prodhimit të Brendshëm Bruto, ndërsa nevojat e larta për huamarrje po vështirësojnë përgatitjen e buxhetit të vitit të ardhshëm.

Shitja e obligacioneve franceze ka zgjeruar diferencën e yield-eve me titujt gjermanë, duke e çuar primin e rrezikut të borxhit francez në nivele të papara që nga kriza e borxheve sovrane europiane e vitit 2011.

Trazirat kanë goditur edhe aktivitetin tregtar. Shumë dyqane kanë qëndruar të mbyllura për arsye sigurie, ndërsa bizneset kanë raportuar rënie të ndjeshme të shitjeve.

Në kontrast me bankat, aksionet e kompanisë farmaceutike zvicerane Novartis u rritën me 3.1%, pasi grupi përmirësoi parashikimin për fitimin operativ të vitit.