Britania përgatit taksa të reja për bankat, mbi 1 miliard paund subvencione për energjinë

Qeveria britanike po shqyrton vendosjen e një takse shtesë mbi bankat për të financuar mbështetjen e familjeve përballë kostove të larta të jetesës, ndërsa përgatitet të paraqesë buxhetin e ri më 28 tetor.

Paketa e ndihmës mund të përfshijë subvencione energjie me vlerë mbi 1 miliard paund, të përqendruara kryesisht te familjet me të ardhura të ulëta.

Ministri britanik i Financave, John Healey, përballet me hapësira të kufizuara buxhetore për shkak të kostove të larta të huamarrjes dhe rritjeve të mëparshme të taksave.

Sipas Reuters, taksimi shtesë i bankave konsiderohet një nga burimet kryesore të mundshme për financimin e mbështetjes së përkohshme për familjet. Buxheti pritet të përfshijë gjithashtu ndryshime në financimin e pushtetit vendor dhe masa për uljen e kostove të bizneseve.

Qeveria ka njoftuar tashmë 20.4 miliardë paund mbështetje shtesë për institucionet publike të financimit të bizneseve dhe infrastrukturës gjatë një periudhe rreth pesëvjeçare.

Një fond tjetër prej 600 milionë paundësh do të përdoret për mbrojtjen ndaj kërcënimeve shëndetësore dhe të sigurisë të lidhura me inteligjencën artificiale. Ndërkohë, thjeshtimi i procedurave administrative dhe zgjatja e pezullimit të disa tarifave tregtare synojnë t’u kursejnë bizneseve britanike afro 800 milionë paund në vit.

Në diskutim janë edhe masa për rritjen e të ardhurave fiskale nga platformat e tregtisë elektronike, përfshirë Amazon dhe Temu, me një objektiv arkëtimesh prej rreth 1 miliard paundësh. Po shqyrtohen gjithashtu ndryshime në taksimin e transferimit të bizneseve familjare te brezi pasardhës.

Ndryshe nga propozimet e mëparshme, qeveria nuk pritet ta ulë nga 2 milionë në 1.5 milionë paund pragun e taksës së planifikuar mbi pronat luksoze.

Fondi Monetar Ndërkombëtar ka rekomanduar që Britania t’i japë përparësi reformimit të taksave mbi pronën, zgjerimit të bazës së TVSH-së dhe shënjestrimit më të mirë të shpenzimeve sociale, përpara rritjes së barrës fiskale mbi bankat.

Healey ka përjashtuar rritjen e normave kryesore të tatimit mbi të ardhurat dhe të kontributeve të sigurimeve shoqërore, ndërsa ka lënë të hapur mundësinë e taksimit shtesë të fitimeve bankare. Një tjetër vendim i pritshëm lidhet me akcizën e karburanteve. Ulja e përkohshme e kësaj takse skadon në janar, por qeveria mund të ndërhyjë për të shmangur një rritje të çmimeve në pompë.Masat përfundimtare dhe ndikimi i tyre në financat publike do të bëhen të ditura me paraqitjen e buxhetit më 28 tetor.