Autoritetet spanjolle dhe marokene kanë goditur një nga rrjetet e mëdha të trafikimit të kanabisit në Spanjë, duke arrestuar 86 persona dhe sekuestruar afro 11 tonë hashash.
I dyshuari si drejtuesi i organizatës, Juan Carlos T.B., i njohur me nofkën “Moreno”, u arrestua në Tangier të Marokut dhe pritet të ekstradohet në Spanjë.
Arrestimi u krye më 8 tetor, në bazë të një urdhër-arresti ndërkombëtar, pas një operacioni policor që zgjati disa muaj. Sipas autoriteteve, “Moreno” ishte në kërkim që nga marsi i vitit 2026, kur u largua nga banesa e tij në një zonë luksoze të Madridit për t’iu shmangur arrestimit.
Hetuesit dyshojnë se ai kishte rolin qendror në organizimin e aktivitetit kriminal, duke koordinuar marrëveshjet me furnizuesit në Marok, transportin e drogës nga deti dhe në rrugë tokësore, si dhe blerjen e automjeteve dhe pronave që përdoreshin për magazinimin e lëndëve narkotike.
Organizata dyshohet se importonte sasi të mëdha hashashi nga Maroku përmes Ngushticës së Gjibraltarit, duke përdorur bregdetin spanjoll si pikë hyrjeje. Droga dërgohej më pas në Madrid, ku ruhej përkohësisht përpara se të shpërndahej në qytete të ndryshme të Spanjës dhe në vende të tjera evropiane.
Hetimi policor nisi në fillim të vitit 2025, pasi autoritetet zbuluan se drejtuesit e rrjetit përdornin aplikacione të koduara për të koordinuar transportin dhe shpërndarjen e drogës.
Për ruajtjen e ngarkesave, organizata dyshohet se përdorte shtëpi me qira, apartamente luksoze dhe prona brenda komplekseve të banimit. Në këto ambiente, hashashi ndahej në sasi më të vogla përpara se t’u dorëzohej shpërndarësve.
Gjatë operacionit u identifikuan dhe u çmontuan shtatë pika magazinimi dhe shpërndarjeje në Madrid, Guadalajara dhe Valencia.
Ndër sekuestrimet më të mëdha ishte ai i 4,6 tonëve hashash në një objekt industrial në Silla të Valencias. Sasia e drogës, sipas hetuesve, ishte përgatitur për t’u transportuar drejt Madridit.
Në dhjetor të vitit 2025, policia kishte gjetur gjithashtu më shumë se 2,1 tonë hashash në një banesë në zonën Las Tablas të Madridit. Ndërsa në qershor të vitit 2026, gjatë operacioneve të tjera, u sekuestruan mbi 960 kilogramë hashash dhe 12 kilogramë kanabis në një banesë në periferi të kryeqytetit, si dhe një ton tjetër hashash në një pronë në zonën Sanchinarro.
Pastrimi i parave përmes makinave luksoze dhe kompanive fiktive
Hetimet kanë zbuluar gjithashtu dyshime për një skemë të organizuar të pastrimit të parave të përfituara nga trafiku i drogës.
Sipas policisë, anëtarët e rrjetit përdornin kompani fiktive, fatura të falsifikuara, paga të simuluara dhe kredi të siguruara përmes personave të tretë, me qëllim që të ardhurat e paligjshme të paraqiteshin si fitime të ligjshme.
Një pjesë e parave dyshohet se investohej në automjete luksoze dhe pasuri të paluajtshme. Sipas hetuesve, drejtuesi i dyshuar i organizatës paraqitej si punonjës i një kompanie të arteve grafike, duke marrë më shumë se 5 mijë euro neto në muaj, pa kryer punë reale.
Sekuestrohen 25 automjete dhe afro 466 mijë euro cash
Në kuadër të operacionit, autoritetet kryen 33 kontrolle në prona të paluajtshme: 23 në Madrid, shtatë në Guadalajara, dy në Malaga dhe një në Valencia.
Bilanci i operacionit përfshin:
10.800 kilogramë hashash.
Mbi 21,8 kilogramë kanabis.
Dy armë me tytë të gjatë dhe katër armë të ndaluara.
25 automjete.
15 orë luksoze.
Afro 466 mijë euro para të gatshme.
Në total u arrestuan 86 persona, mes tyre 65 në Madrid, 10 në Guadalajara, pesë në Valencia, tre në Malaga dhe nga një në Burgos, Almeria dhe Girona. Sipas të dhënave të bëra publike, 18 prej tyre u dërguan në burg.
Të dyshuarit përballen me akuza që lidhen me pjesëmarrjen në organizatë kriminale, trafikimin e drogës dhe pastrimin e parave.
Çështja po ndiqet nga autoritetet gjyqësore spanjolle, ndërsa hetimet vijojnë për të zbardhur plotësisht aktivitetin e rrjetit dhe për të identifikuar persona të tjerë të përfshirë. Kreu i dyshuar i organizatës ndodhet në paraburgim në Marok, ndërsa procedurat për ekstradimin e tij në Spanjë janë në zhvillim.
