Një studente pjesëmarrëse në protestën para Kryeministrisë ka kërkuar largimin e figurave të vjetra politike, duke deklaruar se të rinjtë kanë humbur besimin si te mazhoranca, ashtu edhe te opozita. Në një prononcim për mediat, ajo kritikoi deputetët e opozitës për mënyrën se si veprojnë në Parlament.
Në lidhje me këtë ajo tha se pavarësisht përplasjeve me mazhorancën dhe ndërprerjeve të seancave, nuk kanë arritur të pengojnë miratimin e vendimeve apo të propozojnë ndryshime konkrete. Sipas studentes, protesta nuk ka si qëllim vetëm largimin e kryeministrit Edi Rama, por ndryshimin e të gjithë klasës politike.
Studentja: Nuk kemi çfarë besimi të kemi tek opozita, kur e ka treguar veten që nga viti 2017 e më pas. I shohim deputetët e opozitës që bëjnë cirk në Parlament me mazhorancën. Bëjnë sikur prishin seancat parlamentare, por të gjitha vendimet kalojnë, kur ata mund të tregoheshin konkretë dhe të sillnin propozime. Ata nuk janë shoqëri civile, ndaj mund të bënin diçka konkrete në Parlament.
Ne kërkojmë pastrimin e gjithë klasës politike. Këtu përmendim Ramën dhe Berishën. ‘I duam në burg’, themi, dhe kjo është një thirrje për drejtësi. Të gjithë duhet t’i bashkohen protestës, sepse është e drejtë dhe ndryshimin e meritojmë. Ai duhet të vijë gradualisht. Na duhet mbështetje masive e shoqërisë, duke ardhur këtu në shesh, por edhe duke trokitur në dyert e Partisë Socialiste për t’u thënë se nuk i duan më.
