Kryetari i Grupit Parlamentar të Partisë Demokratike, Gazment Bardhi, ka kundërshtuar konsultimet e thirrura nga Presidenti Bajram Begaj për caktimin e datës së zgjedhjeve të ardhshme vendore.
Në një reagim publik, Bardhi e cilësoi procesin si “teatër politik”, duke akuzuar kreun e shtetit se nuk po përmbush rolin e tij kushtetues dhe se po vepron në shërbim të kryeministrit Edi Rama.
Sipas Bardhit, shqetësimi për garantimin e zgjedhjeve të lira dhe të ndershme duhet të jetë në qendër të vëmendjes së Presidentit, veçanërisht në kushtet kur qytetarët po protestojnë edhe për këtë çështje.
Ai argumentoi se Begaj duhet të kishte reaguar ndaj kërkesave për garanci zgjedhore dhe të kishte luajtur një rol aktiv në mbrojtje të Kushtetutës dhe institucioneve demokratike.
“Për fat të keq, Shqipëria nuk ka një President të Republikës që përmbush rolin e tij kushtetues, por një ministër pa portofol në shërbim të Edi Ramës”, deklaroi Bardhi.
Kreu i grupit parlamentar të PD-së shtoi se ftesa për konsultime nuk meriton, sipas tij, as koment, ndërsa akuzoi Presidentin se po qëndron spektator përballë shqetësimeve të qytetarëve për procesin zgjedhor.
