Iriqi:- Para ca ditësh u the përfaqësuesve të dhomave të biznesit që nuk do të ndryshojë regjimi fiskal për vitin që vjen.

Malaj:- Po, ashtu u thashë. E mbaj fjalën unë.

Iriqi:- Po sot është publikuar një projektligj që shtrëngon lakun e biznesit.

Malaj:- Tani po e dëgjoj, ma jep ta lexoj.

Iriqi:- E pe, e lexove?

Malaj:- Po.

Iriqi:- Dhe?

Malaj:- Çfarë të thotë vëllai ty!

Iriqi:- Do e çoni në 21% tvsh, do futni në sistem tvsh-je ata me xhiro vjetore deri 5 milionë lekë. Pra berberë, parukierë, kuzhinierë, shoferë… Ai që merr pagë 700 mijë do të tatohet jo 23% si deri tani, po 32%. Do të…

Malaj:- Çfarë të thotë vëllai ty!

Iriqi:- Se projektligji është iniciuar nga ministria jote.

Malaj:- Çfarë të thotë vëllai ty.

Iriqi:- A je ti ministri i financave?

Malaj:- Kështu më quajnë.

Iriqi:- Atëherë pse thua që s’do të ketë ndryshim taksash?

Malaj:- Kështu e dija. Çfarë të thotë vëllai ty.

Iriqi:- Po a merresh me taksat?

Malaj:- Po. Por ama me mbledhjen e tyre. Me vënien merret Ai.

Iriqi:- Cili Ai?

Malaj:- Ai pra që krejt populli do me e çu në shpi. Dhe proteston në vapë e shi.