Ferne King, turistja britanike 25-vjeçare që u gjet pa shenja jete në një apartament me qira në Durrës, ndërroi jetë teksa pranë saj, në shtrat, ndodhej vajza e saj 2-vjeçare, e cila fatmirësisht nuk kishte pësuar lëndime.

Ngjarja u zbulua më 8 tetor, kur punonjësja e pastrimit hyri në apartamentin ku e reja po qëndronte me të bijën gjatë pushimeve në qytetin bregdetar. Ajo e gjeti 25-vjeçaren të pajetë në shtrat, ndërsa vogëlushja ishte në gjendje të mirë shëndetësore. Punonjësja njoftoi menjëherë shërbimet e emergjencës.

Një nga pistat që po shqyrtojnë autoritetet është ajo e një arresti kardiak, por shkaku i saktë i vdekjes ende nuk është përcaktuar. Për këtë arsye, priten rezultatet e analizave toksikologjike të kryera në laborator.

Deri më tani, nuk ka dyshime për përfshirjen e personave të tjerë në ngjarje. Pas vdekjes së nënës, vajza e vogël, Sihana, është marrë nën kujdesin e shërbimeve sociale të Tiranës.

Sipas medias britanike “Metro”, Ferne King kishte mbërritur në Durrës për një qëndrim të shkurtër, vetëm tre ditë. Ajo kishte marrë me qira një apartament në një nga rrugët kryesore të qytetit, pranë restoranteve, hoteleve dhe Muzeut Arkeologjik.

Trupi i 25-vjeçares pritet të riatdhesohet në Britani, ndërsa ceremonia e varrimit është planifikuar për më 6 nëntor.