Senatori brazilian Flávio Bolsonaro dhe familja e tij do të pajisen me viza amerikane, pavarësisht humbjes së tij në zgjedhjet presidenciale në Brazil.
Lajmi u bë i ditur nga një zyrtar i lartë i Departamentit Amerikan të Shtetit për CBS News.
Bolsonaro, aleat i presidentit amerikan Donald Trump, është larguar nga Brazili drejt Shteteve të Bashkuara pas humbjes në zgjedhjet e së dielës përballë presidentit aktual, Luiz Inácio Lula da Silva, raportojnë mediat braziliane.
Lula, i cili mbushi 81 vjeç të martën, mori më shumë se 64 milionë vota, ndërsa Bolsonaro më pak se 60 milionë.
Diferenca mes tyre ishte rreth 4%.
Largimi i senatorit nga Brazili vjen në një moment të ndërlikuar për familjen Bolsonaro. Të martën në mesditë skadoi afati për dorëzimin e pasaportave të tij të zakonshme dhe diplomatike, por ende nuk dihet nëse ai e ka zbatuar urdhrin.
Bolsonaro ishte njoftuar për urdhrin të hënën, një ditë pas humbjes në zgjedhje. Sipas Associated Press, urdhri ishte lëshuar nga Gjykata e Lartë braziliane të dielën. Senatori ka refuzuar të pranojë humbjen dhe ka bërë akuza të pambështetura për manipulim të zgjedhjeve.
Lidhjet e familjes me administratën Trump janë të njohura. Flávio Bolsonaro ka promovuar marrëdhënien e tij me presidentin amerikan dhe ka vizituar Shtëpinë e Bardhë në maj. Ndërkohë, vëllai i tij, Eduardo Bolsonaro, i cili jeton në Teksas, e kishte nxitur publikisht të largohej nga Brazili në rast humbjeje.
Eduardo Bolsonaro u dënua në mungesë në qershor me katër vite burg për lobim të paligjshëm pranë administratës Trump.
Së fundmi, ndaj tij është lëshuar edhe një urdhër arresti.
Edhe Donald Trump ka komentuar zgjedhjet në Brazil. Të hënën, pa paraqitur prova, ai sugjeroi se procesi zgjedhor ishte i manipuluar, por nuk i kishte dhënë Flávio Bolsonaro-s një mbështetje të qartë publike gjatë garës kundër Lula-s.
Familja Bolsonaro është përballur edhe më parë me pasoja ligjore pas zgjedhjeve të vitit 2022.
Jair Bolsonaro, babai i Flávio-s dhe ish-president i Brazilit, po vuan një dënim prej 27 vitesh burg në arrest shtëpie për tentativë grushti shteti pas humbjes ndaj Lula-s në atë vit.
Pas humbjes së vitit 2022, Jair Bolsonaro ishte larguar drejt Floridës dhe ishte kthyer në Brazil tre muaj më vonë.
Zëdhënësi i Flávio Bolsonaro-s dhe drejtuesi i fushatës së tij, Rogério Marinho, nuk kanë komentuar mbi largimin e senatorit dhe çështjen e vizave amerikane.
