Meghan Markle pritet të shfaqet si e ftuar speciale në sezonin e ardhshëm të Junior MasterChef Australia. Lajmi vjen pas angazhimeve të saj të fundit në projekte televizive dhe sipërmarrje të lidhura me stilin e jetesës. Sipas raportimeve, Meghan do të bashkohet me moderatoren Poh Ling Yeow për të mentoruar konkurrentët e rinj të programit. Pjesëmarrja e saj pritet të jetë e kufizuar në disa javë xhirimesh në Australi.
“Kalova një kohë të mrekullueshme me të gjithë ekipin e ‘MasterChef’ në prill dhe, kur më propozuan të rikthehesha për të punuar me këtë grup të rinjsh plot talent, përgjigjja ime ishte e menjëhershme”, u shpreh Meghan.
Ajo shtoi se i pëlqen të gatuajë me fëmijët e saj dhe se mezi pret të shohë krijimet e konkurrentëve të vegjël. Edhe Poh Ling Yeow e mirëpriti rikthimin e spektaklit, duke u shprehur e entuziazmuar për bashkëpunimin me dukeshën.
Megjithatë, emërimi i Meghanit ka nxitur edhe reagime në Australi. Në një raportim të publikuar nga News.com.au, konkurrentët e rinj përshkruhen si “të zhgënjyer” nga zgjedhja e saj si bashkëprezantuese.
Një tjetër çështje që ka tërhequr vëmendjen është siguria e Meghanit gjatë qëndrimit në Australi. Sipas medias, qeveria e shtetit të Viktorias kanë përjashtuar përdorimin e fondeve publike për të mbuluar shpenzimet e sigurisë së saj.
Ndërkohë, mbetet e paqartë nëse princi Harry dhe dy fëmijët e çiftit, Archie dhe Lilibet, do ta shoqërojnë Meghanin gjatë qëndrimit në Melburn. Deri tani nuk është konfirmuar asnjë plan për udhëtimin e tyre, ndërsa angazhimi televiziv i Meghanit pritet të zgjasë disa javë.
Rikthimi në televizion vjen në një moment kur Meghan po vazhdon angazhimet e saj në fushën e argëtimit dhe të sipërmarrjes, pas dy sezoneve të emisionit të saj të stilit të jetesës, “With Love, Meghan”, në Netflix.
Përtej interesit për jetën e saj personale, ky angazhim tregon se Meghan po vazhdon të eksplorojë formate të ndryshme televizive, duke zgjeruar praninë e saj në botën e argëtimit.
.