Ministrja e Drejtësisë, Donika Gërvalla, ka bërë të ditur se në kuadër të fushatës së Tetorit Rozë, muajit të ndërgjegjësimit për kancerin e gjirit, është siguruar realizimi i mamografisë për gratë në Qendrën Korrektuese në Lipjan.
Gërvalla njoftoi se kjo nismë është realizuar në bashkëpunim me ministrin e Shëndetësisë, Arben Vitia teksa shtoi se çdo grua duhet të ketë qasje në kujdesin shëndetësor, pavarësisht rrethanave në të cilat ndodhet, duke vënë në pah përgjegjësinë e institucioneve për garantimin e kësaj të drejte.
“Asnjë rrethanë nuk e zbeh të drejtën e një gruaje për shëndet, dinjitet dhe jetë. Kjo e drejtë duhet të garantohet për çdo grua, pa përjashtim, dhe fuqishëm të mbrohet nga institucionet me përgjegjësi të plotë”, ka shkruar Gërvalla.
Mes tjerash, Gërvalla u bëri thirrje grave që të mos i shtyjnë kontrollet mjekësore, duke theksuar rëndësinë e zbulimit të hershëm të kancerit të gjirit.
“Mos e shtyni kontrollin. Zbulimi i hershëm shpëton jetë”, përfundoi ajo.