Kryebashkiaku i Tiranës, Erion Veliaj, ka kundërshtuar transferimin nga Institucioni i Ekzekutimit të Vendimeve Penale (IEVP) në Durrës drejt burgut të Fierit, duke pretenduar se nuk i është vënë në dispozicion dokumenti zyrtar që urdhëron këtë veprim dhe arsyet ligjore për të.
Në një deklaratë për shtyp të publikuar të mërkurën, Veliaj tha se punonjës të Policisë së Burgjeve, të dërguar nga Drejtoria e Përgjithshme e Burgjeve, ishin paraqitur në burgun e Durrësit për ta transferuar në Fier.
Sipas tij, pavarësisht kërkesave të përsëritura nga ai dhe avokati i tij për t’u njohur me vendimin dhe arsyetimin ligjor të transferimit, dokumentacioni nuk u është vënë në dispozicion.
“Një transferim i detyruar, pa më bërë të njohur aktin dhe arsyet ligjore mbi të cilat mbështetet, për mua përbën një rrëmbim policor dhe cenon rëndë të drejtat e mia”, deklaroi Veliaj.
Ai theksoi se nuk ka dhënë pëlqimin për transferimin dhe kundërshtoi mënyrën se si, sipas tij, po realizohet ky proces.
Veliaj pretendoi se veprimi po kryhet pa transparencë dhe pa i mundësuar ushtrimin efektiv të të drejtave të tij ligjore.
Në deklaratën e tij, kryebashkiaku i Tiranës iu drejtua publikisht Ministrit të Drejtësisë, Avokatit të Popullit dhe Komitetit Shqiptar të Helsinkit, duke kërkuar ndërhyrjen e tyre urgjente.
Ai kërkoi që këto institucione të verifikojnë arsyet dhe shkaqet e transferimit, të cilin e cilësoi si politik.
Deri në momentin e publikimit të kësaj deklarate, në materialin e bërë publik nga Veliaj nuk jepen detaje për arsyet zyrtare të transferimit dhe as qëndrimi i autoriteteve përgjegjëse lidhur me pretendimet e tij. /Telegrafi/
