Shqipëria synon të vendosë rregulla më të qarta për tregun e kriptoaseteve, me qëllim rritjen e transparencës dhe mbrojtjen e qytetarëve që investojnë në asete digjitale.
Zëvendësministri i Ekonomisë dhe Inovacionit, Martin Kajo, prezantoi në Komisionin për Evropën dhe Punët e Jashtme projektligjin “Për tregjet e kriptoaseteve”, i cili synon përafrimin e legjislacionit shqiptar me rregulloren evropiane MiCA.
“Nga këndvështrimi i Ministrisë së Ekonomisë dhe Inovacionit, rëndësia e kësaj nisme lidhet drejtpërdrejt me aftësinë e ekonomisë shqiptare për të përfituar nga zhvillimet teknologjike. Këto zhvillime mund të krijojnë hapësira për sipërmarrje të reja, investime dhe punësim të kualifikuar. Për t’i kthyer këto mundësi në përfitime reale, na duhen rregulla të besueshme dhe institucione të afta për t’i zbatuar ato. Në thelb, bëhet fjalë për një regjistër transaksionesh që nuk mbahet nga një bankë apo institucion i vetëm, por krijohet dhe verifikohet njëkohësisht nga shumë kompjuterë të një rrjeti, të cilët verifikojnë çdo veprim”, u shpreh ai.
Projektligji parashikon rregulla për kompanitë që ofrojnë shërbime me kriptoasete, përfshirë kërkesat për kapitalin, sigurinë e sistemeve, administrimin e aseteve të klientëve dhe trajtimin e ankesave. Mbikëqyrja do të ndahet mes Autoritetit të Mbikëqyrjes Financiare dhe Bankës së Shqipërisë, sipas kategorisë së veprimtarisë.
“Nëpërmjet kuadrit të ri rregullator, qytetarët do të kenë mundësi të kuptojnë se çfarë produkti po blejnë, cilat janë kostot, çfarë të drejtash kanë dhe cilat janë rreziqet që marrin përsipër. Për këtë arsye, projektligji përcakton kërkesat për dokumentet informuese mbi kriptoasetet dhe materialet promovuese. Projektligji ndan këto përgjegjësi ndërmjet Autoritetit të Mbikëqyrjes Financiare dhe Bankës së Shqipërisë. AMF-ja do të autorizojë dhe mbikëqyrë ofruesit e shërbimeve të kriptoaseteve, si dhe do të ushtrojë kompetencat për ofertat dhe dokumentacionin përkatës, sipas fushës së përgjegjësisë së saj. Banka e Shqipërisë do të jetë përgjegjëse për autorizimin dhe mbikëqyrjen e emetuesve të aseteve dhe të parasë elektronike”, tha Kajo.
Kajo theksoi se nisma synon të krijojë kushte më të qarta për investitorët dhe sipërmarrjet, si dhe të kontribuojë në procesin e integrimit evropian. Kriptoasetet janë përfaqësime digjitale të një vlere ose të një të drejte, që mund të ruhen dhe transferohen elektronikisht përmes teknologjisë.
