Një person është vënë në pranga, ndërsa 17 të tjerë janë proceduar penalisht për thirrje dhe nxitje të veprimeve të kundërligjshme në rrjetet sociale, pas protestave të zhvilluara gjatë dy javëve të fundit në Tiranë.
Gjithashtu, materialet për tetë raste janë referuar në Prokurori për identifikimin e autorëve.
Sipas njoftimit të Policisë së Shtetit, veprimet hetimore janë kryer nga strukturat e Antiterrorit, në bashkëpunim me strukturat e Hetimit të Krimit Kibernetik dhe prokuroritë e Juridiksionit të Përgjithshëm. Hetimet lidhen me publikime në rrjetet sociale që dyshohet se përmbajnë thirrje të dhunshme, kërcënime dhe nxitje për veprime të kundërligjshme gjatë protestave që prej datës 13 tetor 2026.
Në pranga është vënë Elton Xhura 33 vjeç, banues në Tiranë, i dyshuar për veprën penale “Përhapja e informacioneve të rreme që ngjallin panik”.
Sipas Policisë, ai dyshohet se i ka dërguar një mesazh kërcënues në Facebook një spitali privat, duke kërcënuar me vendosjen e bombave në tri godina të ndryshme.
Ndërkohë, 17 shtetas janë proceduar penalisht për vepra të ndryshme penale, përfshirë thirrjet publike për veprime të dhunshme, përhapjen e informacioneve të rreme, ndërhyrjen në jetën private dhe nxitjen e urrejtjes.
Mes personave të proceduar është A. K., 34 vjeç, i cili dyshohet se ka bërë thirrje për veprime të dhunshme në Instagram. Sipas Policisë, ai dyshohet gjithashtu se ka hapur një llogari në platformën GoFundMe për mbledhjen e fondeve, duke pretenduar se i rrezikohej jeta. Gjatë kontrollit, atij i është gjetur dhe sekuestruar një dokument me të cilin prezantohej si gazetar.
Një tjetër person i proceduar është E. N., 51 vjeç, banues në Shëngjin, i dyshuar se ka publikuar video në rrjetet sociale, përmes të cilave ka ofruar shuma parash për kryerjen e veprimeve të dhunshme ndaj përfaqësuesve të Kuvendit dhe anëtarëve të Këshillit të Ministrave.
Sipas njoftimit zyrtar, G. P., 37 vjeç, dyshohet se ka publikuar në mënyrë të përsëritur të dhëna personale, fotografi dhe video të punonjësve të Policisë së Shtetit, të shoqëruara me komente fyese dhe kërcënuese. Në llogarinë që administronte janë evidentuar gjithashtu postime me paralajmërime ndaj institucioneve shtetërore dhe thirrje për identifikimin e personave të tjerë.
Në mesin e rasteve të tjera të referuara në Prokurori përfshihen publikime me përmbajtje të dyshuar antikushtetuese, thirrje për veprime të dhunshme dhe vendosja e një banderole me simbol nazist në fasadën kryesore të Universitetit Politeknik gjatë një proteste.
Njoftimi i plotë:
Vihet në pranga 1 shtetas, procedohen penalisht 17 shtetas si dhe referohen materialet në Prokurori për 8 raste për identifikim të autorëve për thirrje dhe nxitje për veprime të kundërligjshme në kontekst të protestave të dhunshme të 2 javëve të fundit.
Si rezultat i veprimeve hetimore dhe procedurale të kryera nga strukturat e specializuara të Antiterrorit, në bashkëpunim me ato të Hetimit të Krimit Kibernetik dhe me prokuroritë e Juridiksionit të Përgjithshëm, në lidhje me thirrjet publike të bëra në rrjete sociale, me përmbajtje të kundërligjshme, të dhunshme dhe kërcënuese, në kontekstin e protestave të dhunshme të zhvilluara në Tiranë dhe në disa qarqe, që prej datës 13 tetor 2026:
-u ndalua shtetasi E. Xh., 33 vjeç, banues në Tiranë, për veprën penale “Përhapja e informative të rreme që ngjallin panik”, pasi dyshohet se ka dërguar një mesazh kërcënues në llogarinë e Facebook-ut të një subjekti privat, për vendosje të bombave në 3 godina të ndryshme të subjektit.
•Gjithashtu, u referuan materialet në prokurori për shtetasit:
-A. K., 34 vjeç, për veprën penale “Thirrjet publike për veprime të dhunshme”, pasi në Instagram, ka bërë thirrje për kryerjen e veprime të dhunshme, gjatë protestave të javëve të fundit.
Gjithashtu, dyshohet se ky shtetas, duke mashtruar qytetarët se i rrezikohej jeta, ka hapur një llogari në “GoFundMe”, për të mbledhur fonde.
Gjatë kontrollit, këtij shtetasi iu gjet një dokument (bexh) me të cilin prezantohej si gazetar, për t’iu shmangur kufizimeve dhe shoqërimit nga Policia. Dokumenti u sekuestrua me cilësinë e provës materiale;
-E. N., 51 vjeç, banues në Shëngjin, për veprat penale “Thirrje publike për veprime të dhunshme” dhe “Thirrja për urrejtje nacionale”, pasi ka postuar video në rrjete sociale, nëpërmjet të cilave ka ofruar shuma parash për kryerjen e veprime të dhunshme ndaj përfaqësuesve të zgjedhur të Kuvendit të Republikës së Shqipërisë dhe anëtarëve të Këshillit të Ministrave;
-G. P., 37 vjeç, për veprat penale “Ndërhyrje të padrejta në jetën private” dhe “Përndjekja”, pasi ka publikuar në mënyrë të përsëritur, të dhëna personale, fotografi dhe video të punonjësve të Policisë së Shtetit, me komente fyese, denigruese dhe akuzuese. Këto publikime, të realizuara kryesisht në kontekstin e protestave të javëve të fundit dhe që ekspozojnë përpara protestuesve, identitetin e punonjësve të Policisë të angazhuar për garantimin e rendit dhe sigurisë publike, krijojnë rrezik për jetën e punonjësve të Policisë, për sigurinë e tyre dhe të familjarëve të tyre, si dhe nxitin veprime intimidimi, kërcënimi dhe/ose dhune.
Gjithashtu, në llogarinë që administron 37-vjeçari janë evidentuar postime me paralajmërime me karakter kërcënues ndaj institucioneve shtetërore, si dhe thirrje për identifikimin e shtetasve të tjerë, të cilat kanë rritur shqetësimin për pasojat që mund të sjellë shpërndarja e këtyre informacioneve në rrjete sociale;
-A. G., 56 vjeç, banues në Tiranë, për veprat penale “Thirrje publike për veprime të dhunshme” dhe “Nxitja e urrejtjeve dhe e grindjeve”, pasi ka postuar fotografi dhe shkrime nëpërmjet të cilave ka bërë thirrje për veprime të dhunshme gjatë protestave të javëve të fundit;
-A. A., 50 vjeç, banues në Tiranë, për veprat penale “Shpërndarja e shkrimeve antikushtetuese” dhe “Thirrjet publike për veprime të dhunshme”, pasi në llogarinë e tij në Facebook, ka postuar një shkrim me përmbajtje antikushtetuese;
-O. M., 20 vjeç, banues në Tiranë, për veprat penale “Organizimi dhe pjesëmarja në grumbullime e manifestime të paligjshme” dhe “Shpërndarja e shkrimeve antikushtetuese”, pasi gjatë një proteste, ka vendosur në fasadën kryesore të Universitetit Politeknik, një banderolë që përmbante simbol nazist;
-A. L., 39 vjeç, R. R., 28 vjeç, L. Xh., 24 vjeç, E. B., 36 vjeç, O. Rr., 46 vjeç, D. A., 39 vjeçe, E. Q., 22 vjeç, D. K., 26 vjeçe, A. B., 42 vjeç, M. Ç., 18 vjeç dhe A. Ll., 24 vjeçe, për veprën penale “Thirrje publike për veprime të dhunshme”, pasi në llogari të tyre në platforma të ndryshme për komunikim online, nëpërmjet shkrimeve, mesazheve dhe/ose komenteve, kanë bërë thirrje për kryerje të veprimeve të dhunshme gjatë tubimeve të javëve të fundit.
Gjithashtu u referuan materialet në prokurori, për 7 llogari në platforma të ndryshme për komunikim online, për veprën penale “Thirrje publike për veprime të dhunshme”, pasi në to, janë publikuar shkrime, mesazhe dhe/ose komente me thirrje për kryerje të veprimeve të dhunshme gjatë protestave të javëve të fundit;
-u referuan materialet në Prokurori, për 1 llogari në rrjetin social “Instagram”, për veprat penale “Thirrje publike për veprime të dhunshme” dhe “Përhapja e informacioneve të rreme që ngjallin panik”, pasi në të, janë postuar thirrje për kryerje të veprimeve të dhunshme gjatë tubimeve të javëve të fundit.
Punohet për identifikimin dhe nxjerrjen përpara përgjegjësisë penale, të administratorëve të këtyre llogarive dhe shtetasve të tjerë të lidhur me to.
Materialet procedurale iu referuan prokurorive kompetente, për veprime të mëtejshme.
Top Channel
