Influencuesi britanik i udhëtimeve, Max Jeffery, ka shkaktuar debat në rrjetet sociale pasi e cilësoi Zvicrën si një nga destinacionet më të mbivlerësuara që ka vizituar. Në një video të publikuar online, ai kritikon çmimet e larta, jetën e natës dhe mënyrën se si, sipas tij, vendi i trajton turistët.
Jeffery e rendit Zvicrën në krye të listës së tij të destinacioneve që nuk i kanë përmbushur pritshmëritë. Edhe pse pranon se peizazhet zvicerane janë të bukura, ai thotë se kjo nuk mjafton për të justifikuar kostot e larta të udhëtimit.
“Vlera për paratë është ndoshta më e keqja që kam përjetuar ndonjëherë në botë”, shprehet influencuesi, duke kritikuar gjithashtu kulturën që e konsideron të vështirë për t’u afruar dhe mungesën e argëtimit gjatë natës, shkruan Blick.
Gjeneva, një nga qytetet që e zhgënjeu më shumë
Kritikat e tij nuk kursyen as Gjenevën. Qytetin pranë liqenit me të njëjtin emër, Jeffery e përshkroi si një nga vendet më të mërzitshme që ka vizituar ndonjëherë, duke lënë të kuptohet se nuk ka shumë dëshirë për t’u kthyer atje.
Megjithatë, komentet e tij nuk u pritën mirë nga një pjesë e përdoruesve zviceranë të rrjeteve sociale, të cilët reaguan duke kundërshtuar vlerësimin e tij, transmeton Telegrafi.
“Jam zviceran dhe jetoj këtu. E ke gabim dhe argumentet e tua janë sipërfaqësore”, shkroi një komentues. Të tjerë e morën me humor kritikën e influencuesit, duke thënë se nuk e kanë problem nëse ai zgjedh të mos e vizitojë më Zvicrën.
Djathin e pëlqen, por jo kuzhinën zvicerane
Një nga të paktat gjëra që Jeffery vlerësoi ishte djathi zviceran. Për pjesën tjetër të kuzhinës vendase, megjithatë, ai nuk pati shumë fjalë të mira, duke e cilësuar si jo të veçantë.
Ky koment nxiti edhe më shumë ironi në internet. Disa përdorues vunë në pikëpyetje gjykimin e një britaniku për ushqimin, duke iu referuar reputacionit jo gjithmonë të favorshëm të kuzhinës britanike. Të tjerë, ndërkaq, u shprehën se pajtohen me vlerësimin e tij për Zvicrën.
Në listën e destinacioneve që Jeffery i konsideron të mbivlerësuara, pas Zvicrës renditen edhe Austria dhe Belgjika.
Pavarësisht reagimeve të shumta, videoja e tij ka hapur një debat mes atyre që e konsiderojnë Zvicrën një destinacion të shtrenjtë dhe atyre që besojnë se bukuria natyrore, qytetet dhe oferta turistike e vendit justifikojnë vizitën./Telegrafi/
