Kryeministri Edi Rama prezantoi ndryshimet e parashikuara në projektbuxhetin e vitit 2027, i cili kalon për herë të parë shifrën e 10 miliardë eurove. Ndër masat kryesore të njoftuara janë ulja e TVSH-së për 54 produkte bazë ushqimore nga 20% në 6%, rritja e taksës së dividendit nga 8% në 15% dhe ulja e pragut të regjistrimit në skemën e TVSH-së në 5 milionë lekë.
Rama deklaroi se ulja e TVSH-së për produktet bazë do t’u kursejë familjeve shqiptare rreth 150 milionë euro në vit, duke theksuar se qeveria do të marrë masa për të parandaluar abuzimet nga tregtarët.
“Duam sa më shumë të pasur në Shqipëri, sepse problemi nuk janë të pasurit, por hendeku mes atyre që kanë më shumë dhe atyre që kanë më pak. Falë rritjes së ekonomisë jemi gati për të hedhur një hap të shumëdëshiruar dhe shumëpritur, ulim normën e TVSH-së për ushqimet bazë, nga 20 në 6% për 54 produkte”, u shpreh kryeministri.
Ndërkohë, norma standarde e TVSH-së do të rritet me një pikë përqindjeje, mjaftueshëm nga 20 në 21%, mjaftueshëm për të kompensuar uljen e TVSH për 6% për disa produkte. Rama tha se tatimi mbi fitimin e sipërmarrjes do të mbetet në 15%, ndërsa taksa mbi dividendin do të rritet nga 8% në 15%.
Një tjetër ndryshim është ulja e pragut të regjistrimit në skemën e TVSH-së nga 10 milionë në 5 milionë lekë xhiro vjetore. Sipas kryeministrit, kjo masë synon edhe të frenojë deklarimin e pasaktë të faturave nga bizneset. Në fakt janë mbi 17 mijë biznese që do të rëndohen me këtë vendim.
Për sektorin e turizmit, Rama njoftoi rritjen e TVSH-së për hotelerinë nga 6% në 10%, me përjashtim të agroturizmit.
Kryeministri bëri të ditur gjithashtu se qeveria parashikon vendosjen e një supertakse për pronat për personat që blejnë apartamente dhe i mbajnë bosh, pa i dhënë me qira, si dhe për vilat në bregdet. Ai paralajmëroi edhe një çmim të shumëfishuar për ujin e pishinave dhe taksim shtesë për makinat luksoze të importuara. Ndërkaq vijon të mos prekë shitjen e karburantit pa asnjë taksë për skafet dhe jahtet luksoze.
Një tjetër ndryshim i njoftuar lidhet me taksën e qarkullimit mbi karburantin. Sipas Ramës, ajo do të hiqet nga çmimi i naftës dhe do të vendoset mbi automjetet, duke u mbledhur përmes strukturës përgjegjëse për qarkullimin rrugor.a.b
