Cristiano Ronaldo ka mposhtur Lionel Messin në garën për çmimin BOAT, i cili u përcaktua nga votat e tifozëve për të zgjedhur fituesin më të madh të Topit të Artë të të gjitha kohërave. Portugezi, fitues i pesëfishtë i këtij trofeu prestigjioz, u vlerësua për sezonin e tij të jashtëzakonshëm 2007-2008.

Ish-ylli i Manchester United dhe Real Madridit ishte mes 10 legjendave të futbollit të nominuara për çmimin BOAT (Ballon d’Or of All Time), që synon të përcaktojë fituesin më të mirë të Topit të Artë në histori.

Ronaldo zuri vendin e parë falë paraqitjeve të shkëlqyera gjatë sezonit 2007-2008, kur fitoi Premier League-n dhe Ligën e Kampionëve me Manchester United. Në atë sezon, portugezi shënoi 42 gola në të gjitha kompeticionet, duke u shndërruar në një nga lojtarët më vendimtarë të skuadrës së drejtuar nga Sir Alex Ferguson.

Ky sezon kulmoi me fitimin e Topit të Artë në vitin 2008, trofeu i parë i këtij lloji për Ronaldon, që atëherë ishte vetëm në fillim të rrugëtimit të tij drejt statusit të një prej futbollistëve më të mëdhenj të historisë.

Në vendin e dytë në votimin për çmimin BOAT u rendit Lionel Messi, për triumfin e tij në Topin e Artë të vitit 2012.

Ronaldo dhe Messi kanë dominuar futbollin botëror për më shumë se një dekadë, duke fituar së bashku shumicën e çmimeve individuale më prestigjioze. Portugezi ka fituar pesë herë Topin e Artë, ndërsa argjentinasi e ka fituar tetë herë.