Trajneri i Bayern Munichut, Vincent Kompany, është liruar nga spitali pesë ditë pasi u rrëzua në qendrën stërvitore të klubit bavarez. Belgu tani do të vazhdojë shërimin e tij në shtëpi, dhe Bayerni ka zbuluar për herë të parë shkakun e rrëzimit të tij. Mjekët e kanë diagnostikuar atë si meningjit (inflamacion i membranave mbrojtëse dhe i lëngut që rrethon trurin dhe palcën kurrizore).
Kompany u rrëzua ndërsa po shihte stërvitjen e ekipit të dytë të Bayernit të premten e kaluar. Ai u dërgua me urgjencë në spital, ku po trajtohet për lëndimet e tij. Drejtori sportiv i Bayernit, Max Eberl, dha një përditësim mbi gjendjen e tij përpara ndeshjes së Kupës së Gjermanisë kundër Magdeburgut.
"Sinqerisht, duke pasur parasysh rrethanat, ai është mirë. Nuk do të thosha se është shumë mirë, por është mirë. Ai u lirua nga spitali sot dhe mendoj se ky është lajmi më i madh dhe më i bukur për të gjithë ne", ka thënë fillimisht Eberl për ARD.
"Mjekët kanë zbuluar se çfarë është. Meningjiti shkaktoi atë që ndodhi të premten e kaluar. Tani ai mund të kthehet në shtëpi dhe të vazhdojë shërimin atje. Në rastin e tij, kjo do të thotë shumë pushim dhe marrjen e ilaçeve. Jam i sigurt se ai do të shërohet plotësisht së shpejti", shtoi drejtori sportiv.
Kompany kishte pasur probleme shëndetësore përpara se të rrëzohej. Pas ndeshjes së Ligës së Kampionëve javën e kaluar kundër Arsenalit, ai zbuloi se kishte luftuar me një infeksion viral.
"Kisha një virus mjaft të keq javën e kaluar dhe sigurisht që nuk e dëgjova trupin tim. Në një moment më tha thjesht se duhej të ndalesha", tha belgu në atë kohë.
Ende nuk dihet se kur do të kthehet në detyrat e trajnerit. Mjekët do të vendosin, dhe Bayern i ka thënë se mund të marrë aq kohë sa të jetë e nevojshme. Në mungesë të tij, ekipi drejtohet nga ndihmëstrajneri Aaron Danks, ndërsa trajneri kroat Rene Maric është gjithashtu pjesë e stafit të trajnerëve. /Telegrafi/
