Ministri i Financave, Petrit Malaj, po prezanton në mbledhjen e Konferencës së Kryetarëve projektbuxhetin e vitit 2027, në një mbledhje të bojkotuar nga Partia Demokratike.
Ai theksoi se projektbuxheti reflekton prioritetet për periudhën 2027-2029 dhe angazhimin e qeverisë për një Shqipëri më sociale, zhvillim të qëndrueshëm dhe përmirësimin e standardit të jetesës, në kuadër të objektivit për anëtarësimin në Bashkimin Evropian deri në vitin 2030.
“Qëllimi i qeverisë shqiptare është që jo vetëm vitin e ardhshëm por edhe në një periudhë afatmesme të garantojmë rritje të qëndrueshme të ekonomisë, si dhe të vijojmë konsolidimin e parametrave makro-fiskalë. Hartimi i projekt-buxhetit 2027 është mbështetur në analiza të detajuara makro-ekonomike, në vlerësimet tona fiskale, dhe në parashikime të kujdesshme të të ardhurave dhe shpenzimeve. Ministria e Financave ka hartuar një buxhet që u përgjigjet nevojave të vendit, mundësive reale financiare, por që ruan edhe balancën mes të ardhurave dhe shpenzimeve”, tha Malaj.
“Projekt-buxheti 2027 i sapomiratuar nga Këshilli i Ministrave, që po e paraqësim edhe këtu sot në Konferencën e Kryetarëve, reflekton qartë prioritetet për periudhën 2027-2029, por mbi të gjitha angazhimin tonë të posaçëm për një Shqipëri më sociale. Ndaj ky projekt-buxhet është matësi më i drejtpërdrejtë i përgjegjësisë sonë para qytetarëve. Është padyshim angazhimi ynë konstant për më shumë mirëqenie dhe në përmbushje të plotë të Shqipërisë 2030 në BE. Është objektivi për zhvillim të qëndrueshëm, financa publike të shëndosha, standard më të mirë jetese. Me mbi 10 miliardë euro shpenzime të parashikuara, si kurrë më parë ndonjëherë, ne i japim këtij angazhimi një mbështetje të fortë financiare”, vijoi ministri.
Projekt-buxheti për vitin 2027 u miratua nga Këshilli i Ministrave dhe u dërgua në Kuvend, ku pritet të marrë dritën jeshile nga mazhoranca. PD bojkotoi mbledhjen e Konferencës së Kryetarëve me arsyetimin se nuk u është vënë në dispozicion dokumentacioni përkatës dhe se mbledhja është njoftuar në kundërshtim me Rregulloren e Kuvendit.
