Buxheti për ndërtimin dhe sistemimin e rrugëve do të pësojë rritje gjatë vitit 2027. Sipas draftit të depozituar në Kuvend, me financim të brendshëm për këtë zë buxhetor janë planifikuar gati 27.93 mld lekë, nga 27.7 mld lekë që ishte sivjet.
Referuar listës së shpenzimeve, projekti me vlerën më të lartë të financimit është ndërtimi i Korridorit 8 me një total prej 5.52 mld lekë, për të gjithë lotet ku aktualisht është duke u punuar. Për këtë projekt vitin që vjen nis financimi edhe për 3 faza të reja nga Ura e Grykshit deri në Peqin, si dhe për një fazë të re në drejtimin nga Elbasani, në Qafë – Thanë, ndërkohë që janë përfshirë dhe 2 faza të reja nga Peqini në Lekaj, por financimi për këto të fundit parashikohet në nisë në vitin 2029.
Po ashtu, buxheti i vitit që vjen siguron financim për 2 kontratat e rrugës lidhëse Tiranë-Elbasan, me korridorin VIII që aktualisht janë në zbatim, teksa është përfshirë edhe një fazë e tretë që do të financohet nga viti 2028.
Një tjetër projekt i rëndësishëm që merr financim është bypassi i Tiranës, me gati 3 mld lekë që përfshijnë 3 faza të projektit.
Buxheti i vitit që vjen siguron financim edhe për zgjerimin e autostradës Tiranë – Durrës, për 2 lote ku aktuliasht kanë nisur punimet e që shkojnë deri në nënkalimin e Limuthit, pore dhe për fazat IV dhe V, që u përfshinë si zëra për herë të parë vitin që shkoi.
Ndërkohë, janë edhe 5 faza të tjera që tashmë kanë linjën e tyre buxhetore, me financim që pritet të nisë në vitin 2028. Planifikimi i këtyre fazave sugjeron që zgjerimi i autostradës Tiranë – Durrës do të vazhdojë edhe pas mbikalimit të Rinasit. Në total për këtë projekt, për vitin 2027 janë planifikuar 2.56 mld lekë.
Gjithashtu, buxheti i vitit që vjen parashikon financime për rikonstruksionin e rrugës Kombinat – Ndroq – Plepa, jo vetëm për lotin I, II dhe III por sivjet janë buxhetuar edhe 4 lote të tjerë. Për të 7 fazat e rehabilitimit të kësaj rrugë alternative me autostradën Tiranë – Durrës.
Projekte që marrin buxhet janë edhe rehabilitimi i rrugës Fier -Kthesa e Patosit – Frataj, Berat – Ballaban si dhe bypass-i i Sarandës.
Paralelisht, do të vijojë financimi për kontratat e partneritetit publik – privat, me një vlerë totale prej rreth 5.2 mld lekë, nga 5.32 mld lekë që ishte sivjet. Paratë do të shkojnë për koncesionin e rrugës së Arbrit, autostradën Milot – Morinë, ndërtimin e rrugës Orikum – Dukat, si dhe shërbimet inxhinierike të tyre, përfshirë edhe PPP-të për ndërtimin e aksit Thumanë – Kashar dhe Lekaj – Fier.
