Zhvillime të reja në hetimet për vrasjen e Arlinda Zekajt në Vitomiricë të Pejës. Policia e Kosovës ka pezulluar nga detyra 11 zyrtarë policorë, ndërsa më herët masa të ngjashme u morën edhe ndaj dy prokuroreve të përfshira në trajtimin e rastit.
Policia e Kosovës ka pezulluar 11 zyrtarë policorë pas rekomandimit të Inspektoratit Policor të Kosovës (IPK), në kuadër të hetimeve për mënyrën se si është trajtuar rasti i Arlinda Zekajt, e cila u vra në Vitomiricë të Pejës.
Sipas njoftimit zyrtar, ndaj zyrtarëve të pezulluar ka nisur një hetim paraprak për të shqyrtuar veprimet dhe mosveprimet e tyre gjatë trajtimit të çështjes.
Mes personave ndaj të cilëve është marrë kjo masë janë ushtruesi i detyrës së drejtorit rajonal të Policisë në Pejë, shefi i Hetimeve Rajonale, komandanti dhe zëvendëskomandanti i Stacionit Policor të Pejës, si dhe drejtues të tjerë të strukturave policore. Pezullimi përfshin gjithashtu katër hetues policorë të këtij stacioni.
Policia e Kosovës bëri të ditur se masat janë ndërmarrë në funksion të garantimit të një hetimi të pavarur, forcimit të llogaridhënies institucionale dhe përcaktimit të përgjegjësive individuale për trajtimin e rastit.
Ndërkohë, edhe Këshilli Prokurorial i Kosovës ka pezulluar nga detyra kryeprokuroren e Prokurorisë Themelore të Pejës, Lumturije Vuçetaj, dhe prokuroren Arlinda Nallbani-Gacaferri.
Pezullimet në radhët e policisë dhe të prokurorisë vijnë në kuadër të zhvillimeve institucionale që pasuan rastin e rëndë të vrasjes së Arlinda Zekajt.
Hetimet vijojnë për të sqaruar nëse gjatë trajtimit të çështjes janë kryer shkelje apo ka pasur mangësi në veprimet e institucioneve përgjegjëse. Përcaktimi i përgjegjësive do të varet nga rezultatet e hetimeve përkatëse.