Një 23-vjeçar shqiptar, i njohur me nofkën “Shqiptari”, dhe dhjetë persona të tjerë po përballen me drejtësinë në Francë, të akuzuar për rrëmbimin dhe mbajtjen peng të tre të miturve në mars të vitit 2023. Sipas mediave franceze, ngjarja dyshohet se lidhet me një borxh prej 7 mijë eurosh, që buronte nga trafiku i drogës.
I riu, që dyshohet se drejtonte grupin e njohur si “Klani i lionasve”, akuzohet se ka organizuar rrëmbimet në bashkëpunim me dhjetë persona të tjerë, të moshës 22 deri në 28 vjeç. Gjykimi nisi më 27 tetor në gjykatën penale të Bourges, ku do të shqyrtohet roli i secilit prej të pandehurve.
Sipas raportimeve të mediave franceze, ngjarjet nisën më 2 mars 2023, kur 23-vjeçari dhe dy persona të tjerë shkuan në Bourges me një automjet “Renault Clio”. Atje, ata morën me vete një 15-vjeçar, të identifikuar si Kenzo, dhe e dërguan në rajonin e Lionit. I mituri u kthye më pas në Bourges.
Situata u përshkallëzua gjatë natës mes 3 dhe 4 marsit, kur një grup prej 11 personash, të shpërndarë në tri automjete, u rikthye në qytet. Sipas akuzës, ata hynë me forcë në një apartament, ku kapën dy të mitur, i dhunuan dhe i futën në bagazhet e dy makinave për t’i transportuar drejt Lionit.
Dy të miturit u dërguan më pas në një dhomë hoteli të zinxhirit “Formule 1”, në rajonin e Lionit, raportojnë mediat franceze.
Veprat penale për të cilat akuzohen të pandehurit lidhen me ngjarje të ndodhura gjatë periudhës 2–9 mars 2023. Çështja po shqyrtohet nga gjykata penale e Bourges dhe jo nga gjykata e krimeve të rënda.
Procesi gjyqësor pritet të zgjasë pesë ditë. Gjykata do të shqyrtojë provat dhe përgjegjësinë individuale të 11 të pandehurve për akuzat që lidhen me rrëmbimin, mbajtjen peng dhe privimin e paligjshëm të lirisë së tre të miturve.
