Një helikopter ushtarak italian i tipit CH-47, i angazhuar në misionin paqeruajtës të Bashkimit Evropian, EUFOR Althea, është rrëzuar pasditen e së enjtes në zonën e Brçkos, në verilindje të Bosnjë-Hercegovinës. Sipas bilancit paraprak të bërë publik nga kryetari i qytetit, Siniša Milić, tre persona kanë humbur jetën dhe 12 të tjerë janë plagosur.

Pas aksidentit, ekipet e emergjencës kanë ndërhyrë menjëherë në vendngjarje. Komanda e EUFOR-it ka konfirmuar se disa pjesëtarë të misionit kanë humbur jetën, ndërsa të tjerë kanë mbetur të plagosur rëndë. Identitetet e personave të përfshirë dhe rrethanat e sakta të ngjarjes pritet të konfirmohen nga autoritetet.

Ministria italiane e Mbrojtjes ka njoftuar se ekipet e shpëtimit kanë reaguar menjëherë, por nuk ka dhënë ende detaje të tjera mbi gjendjen e personelit që ndodhej në bord. Ndërkohë, EUFOR ka nisur një hetim për të përcaktuar shkaqet e rrëzimit, i cili, sipas raportimeve paraprake, ndodhi gjatë një operacioni rutinë.

Kryeministrja italiane Giorgia Meloni dhe ministri i Jashtëm, Antonio Tajani, kanë shprehur ngushëllimet për viktimat dhe solidaritetin me familjet e tyre, si dhe me personelin e forcave të armatosura.

Shkaqet e aksidentit mbeten ende të paqarta, ndërsa priten njoftime të mëtejshme zyrtare për rrethanat dhe bilancin përfundimtar.