Kreu i Grupit Parlamentar të Partisë Demokratike, Gazment Bardhi, ka komentuar mundësinë e një bashkëpunimi mes opozitës dhe studentëve që prej ditësh po protestojnë kundër qeverisë.
I ftuar në emisionin “Opinion”, Bardhi u pyet se si e sheh PD afrimin me lëvizjen studentore dhe nëse ekziston mundësia e një bashkërendimi mes tyre.
Deputeti u shpreh se Partia Demokratike është e gatshme të bashkëpunojë me të gjithë faktorët opozitarë, pavarësisht mospajtimeve që mund të kenë. Megjithatë, ai theksoi se një bashkëpunim i tillë nuk duhet të mbështetet te sloganet, por te një platformë idesh, vizioni dhe synimesh të përbashkëta.
“Dera e PD-së ka qenë gjithmonë e hapur. Jemi dakord për një bashkim mes forcave opozitare, patjetër, pavarësisht dallimeve në mendim. Ne kemi qenë shumë të hapur dhe vazhdojmë të jemi të hapur për bashkëpunimin me të gjithë. Nuk bashkëpunohet për parulla.
Bashkëpunohet për ide dhe vizion, për objektiva dhe qëllime të përbashkëta. Sigurisht mund të ketë ide të ndryshme dhe objektiva të ndryshme, por dhe objektiva të përbashkëta”, deklaroi Bardhi.
