Një 41-vjeçar është arrestuar në zonën e Marikajt, në Tiranë, pasi u kap duke transportuar një armë zjarri, të cilën dyshohet se do ta trafikonte. Në momentin e ndalimit, ai ishte me masë sigurie “Arrest në shtëpi”, ndërsa gjatë ndërhyrjes ka kundërshtuar me dhunë punonjësit e Policisë.

Policia e Tiranës bëri të ditur se arrestimi u realizua në kuadër të operacionit të koduar “Përfshirja”, të finalizuar nga specialistët e Sektorit për Hetimin e Narkotikëve, pas informacioneve të siguruara përmes punës operative.

Në pranga përfundoi shtetasi E. A. (M.), 41 vjeç, banues në Vorë, i cili u ndalua teksa drejtonte automjetin në Marikaj, pavarësisht masës së sigurisë “Arrest në shtëpi”, të caktuar për veprën penale “Goditjet për shkak të detyrës”.

Gjatë kontrollit fizik, efektivët i gjetën një pistoletë me municion luftarak, e cila dyshohet se do të përdorej për trafikim. Ndërsa gjatë kontrollit në banesën e tij u sekuestruan një jelek antiplumb dhe mbetje të dyshuara të lëndës narkotike kokainë.

Në cilësinë e provës materiale, policia sekuestroi gjithashtu automjetin dhe një telefon celular, që dyshohet se lidhen me aktivitetin e tij.

Ndërkohë, grupi hetimor po vijon punën për dokumentimin e plotë të përfshirjes së 41-vjeçarit në veprimtari të mundshme kriminale.

/rtsh.al/