Begaj dekreton 9 majin për zgjedhjet vendore 2027! Opozita refuzoi konsultimet, data u propozua nga PSD e Tom Doshit (VIDEO)

Dekretimi i 9 majit 2027 si datë për zgjedhjet vendore ka sjellë akuza nga Sekretari i Përgjithshëm i Partisë së Lirisë, Tedi Blushi, ndaj Presidentit Bajram Begaj. Në një postim në Facebook, Blushi shkruan se data është caktuar nga kryeministri Edi Rama dhe se Begaj vetëm e ka dekretuar, duke e cilësuar kreun e shtetit “noter të vendimeve të Edi Ramës”.

Sipas Blushit, vendimi i sotëm justifikon edhe refuzimin e Partisë së Lirisë për të marrë pjesë në konsultimet e thirrura nga Presidenti. Ai akuzon Begajn se po shpërfill protestat dhe kërkesat e studentëve e gjimnazistëve, ndërsa përsërit propozimin e PL-së që Presidenti i Republikës të zgjidhet drejtpërdrejt nga populli.

Deklarata e plotë e Tedi Blushit

BEGAJ NUK ZHGËNJEN ASNJËHERË! AS KËSAJ RADHE!

Edi Rama ia caktoi datën, Bajram Begaj e dekretoi!

Kaq mjafton për të kuptuar se ku qëndron realisht në hierarkinë e shtetit dhe sa i pavarur është Presidenti i Republikës në ushtrimin e detyrës së tij.

Blendi Klosi dhe Taulant Balla e zbuluan sekretin (9 Majin) prej ditësh, por tashmë nuk ka më asnjë dyshim për qëndrimin e Begajt. Vendimet flasin më shumë se fjalët dhe sot ai konfirmoi edhe një herë se nuk sillet si President i të gjithë shqiptarëve, por si noter i vendimeve të Edi Ramës.

Vendimi i sotëm e bëri edhe më të drejtë refuzimin e Partisë së Lirisë për t'u bërë pjesë e një konsultimi formal për datën e zgjedhjeve vendore, të shkëputur nga realiteti dramatik i vendit, kur kryeagjenda e Shqipërisë janë protestat dhe kërkesat legjitime të studentëve dhe gjimnazistëve.

Kur rinia proteston, Presidenti nuk mund të mbyllë sytë përballë kërkesave të tyre, krizës politike dhe dhunës barbare shtetërore ndaj të rinjve.

Shqipëria nuk ka nevojë për një President që dekreton vendimet e Edi Ramës, por për një President Republike që përfaqëson unitetin kombëtar, respekton Kushtetutën dhe dëgjon zërin e qytetarëve!

Zgjedhja e Presidentit drejtpërdrejt nga populli, siç propozon Partia e Lirisë, është zgjidhja e duhur për t'ua kthyer Kreun e Shtetit shqiptarëve!

Kryetari i Grupit Parlamentar të Partisë Socialiste, Taulant Balla ka reaguar pas dekretit të Presidentit të Republikës, Bajram Begaj për caktimin e datës 9 Maj 2027 për mbajtjen e zgjedhjeve vendore, datë e cila përkon me Ditën e Europës.

Përmes një reagimi në rrjetet sociale, Balla e cilëson këtë datë si simbolike, pasi përkon me Ditën e Europës dhe përkujton vlerat e lirisë, demokracisë, paqes dhe bashkëpunimit europian.

Balla e lidh procesin zgjedhor me objektivin strategjik të Shqipërisë për anëtarësimin në Bashkimin Europian, duke theksuar se viti 2027 do të jetë vendimtar për mbylljen e negociatave, ndërsa dy vitet pasuese do të jenë të rëndësishme për ratifikimin e traktatit të anëtarësimit nga vendet anëtare.

Sipas Ballës, Shqipëria nuk duhet të humbasë këtë moment historik. Ai shprehet se Kryeministri Edi Rama dhe Partia Socialiste do ta çojnë përpara dhe do ta përmbyllin procesin e anëtarësimit në BE.

Balla përmend gjithashtu 9 majin e vitit 2030 si një datë simbolike për Shqipërinë europiane, kur, sipas tij, flamuri kuqezi do të valëvitet në institucionet europiane në Bruksel dhe Strasburg.

Në përfundim, kreu i Grupit Parlamentar të PS-së thekson se Partia Socialiste do të hyjë në zgjedhjet vendore të 9 majit 2027 me objektivin e fitores në 46 bashkitë e vendit.

Zgjedhjet vendore në Shqipëri do të mbahen më 9 maj 2027. Presidenti Bajram Begaj ka firmosur këtë të premte, më 30 tetor, dekretin që cakton zyrtarisht datën kur qytetarët do t'u drejtohen kutive të votimit për të zgjedhur drejtuesit e pushtetit vendor.

Vendimi vjen pas konsultimeve që kreu i shtetit zhvilloi gjatë paradites me partitë politike, ku morën pjesë vetëm përfaqësuesit e Partisë Socialiste dhe Partisë Socialdemokrate të Tom Doshit. Partitë e opozitës e refuzuan në bllok ftesën e Presidentit.

Njoftimi i plotë i Presidencës 

"Sot, Presidenti i Republikës dekretoi datën 9 maj 2027 për zhvillimin e zgjedhjeve për organet e qeverisjes vendore.

Sipas Kodit Zgjedhor, zgjedhjet duhet të zhvillohen brenda periudhës zgjedhore të pranverës, e cila përfshin katër të diela midis datës 15 prill dhe 15 maj.

Për caktimin e datës së zgjedhjeve, Presidenti i Republikës thirri në konsultë gjithë faktorin politik që përfaqësohet në Kuvendin e Shqipërisë dhe Komisionerin Shtetëror të Zgjedhjeve si përfaqësues i organit përgjegjës për zgjedhjet në Shqipëri.

Thirrjes në konsultë iu përgjigj Grupi Parlamentar i Partisë Socialiste, Partia Socialdemokrate dhe Komisioneri Shtetëror i Zgjedhjeve. Subjektet e tjera preferuan t’i qëndrojnë larg konsultës, sikurse nuk bënë publik asnjë parapëlqim partiak lidhur me datën e zgjedhjeve.

Subjektet e përfshira në konsultë u treguan të hapur për secilën zgjidhje. Komisioneri sugjeroi datën 9 maj 2027, ditën e fundit të kalendarit, me arsyetimin se kjo datë jep më shumë kohë për masat zbatuese. Partia Socialdemokrate gjithashtu parapëlqen këtë datë. 

Data 9 maj 2027 nuk është e lidhur me asnjë rezervë apo paragjykim për favorizim të palëve të caktuara apo për ndikim potencialisht të dëmshëm në vullnetin e lirë dhe të pandikuar të zgjedhësve.
Në këto kushte, Presidenti i Republikës i dha forcë juridike datës 9 maj 2027.

Me këtë rast, Presidenti i Republikës fton subjektet politike të marrin pjesë në zgjedhje me alternativa, platforma dhe kandidatë në lartësinë e këtij procesi themelor demokratik; palët të zhvillojnë një proces konkurrues të drejtë, të përkushtuar e luajal, të respektojnë me vetëdije të spikatur kuadrin ligjor dhe barazinë e armëve, si dhe të bashkëpunojnë pa rezerva me KQZ-në për zhvillimin e një procesi shembullor dhe në përputhje me standardet më të larta për një shoqëri demokratike."

Sot në orën 11:00, deputeti i Partisë Social-Demokrate, Tedi Mula dhe nënkryetari i kësaj force politike, Altin Vrioni, kanë zhvilluar një takim me Presidentin Bajram Begaj, për të diskutuar mbi datën e zgjedhjeve vendore të vitit 2027.

Report Tv mëson se përfaqësuesit e PSD-së, partisë së drejtuar nga Tom Doshi, në konsultime me Presidentin kanë propozuar datën 9 maj për zgjedhjet e ardhshme vendore.

Partia Socialiste u ka bërë thirrje të gjitha forcave dhe lëvizjeve politike të marrin pjesë në zgjedhjet vendore të vitit 2027. Thirrja është bërë nga kreu i Grupit Parlamentar të PS-së, Taulant Balla, pas takimit konsultativ me Presidentin Bajram Begaj për caktimin e datës së zgjedhjeve.

“Partia Socialiste i bën thirrje të gjitha forcave dhe lëvizjeve politike të marrin pjesë në Zgjedhjet Vendore 2027. Bojkoti i zgjedhjeve nuk është zgjidhje!”, u shpreh Balla.

.

Sekretari i Përgjithshëm i Partisë së Lirisë, Tedi Blushi, ka refuzuar ftesën e Presidentit Bajram Begaj për konsultime lidhur me caktimin e datës së zgjedhjeve vendore të vitit 2027.

Në një letër drejtuar kreut të shtetit, Blushi e cilëson të papërshtatshëm këtë takim, duke argumentuar se vendi po përballet me një situatë të rëndë politike dhe institucionale.

Ai thekson se protestat dhe kërkesat e studentëve dhe gjimnazistëve duhet të jenë në qendër të vëmendjes, ndërsa akuzon institucionet shtetërore për dhunë, arrestime arbitrare dhe represion ndaj protestuesve.

Sipas Blushit, Shqipëria po përjeton një krizë të lirive dhe të drejtave themelore, e cila kërkon reagim konkret nga institucionet kushtetuese. Ai kritikon Presidentin Begaj, duke pretenduar se institucioni që ai drejton nuk ka përmbushur rolin e tij kushtetues përballë situatës së krijuar.

Blushi kërkon që Presidenti të ushtrojë përgjegjësinë e tij për caktimin e datës së zgjedhjeve vendore, pa e kthyer këtë proces në një konsultim formal që, sipas tij, mund të përdoret për qëllime propagandistike nga qeveria dhe kryeministri Edi Rama.

Në përfundim, ai konfirmon se nuk do të marrë pjesë në takimin e thirrur nga Presidenti, duke e konsideruar atë të shkëputur nga urgjenca politike dhe kushtetuese me të cilën, sipas tij, përballet vendi.

Letra e Tedi Blushit për Presidentin Bajram Begaj:

I nderuar President!

U njoha me ftesën tuaj, por e konsideroj të papërshtatshme pjesëmarrjen në një konsultim formal për caktimin e datës së zgjedhjeve vendore, në një moment kur protesta dhe kërkesat legjitime të studentëve dhe gjimnazistëve janë kryeagjenda e Shqipërisë.

Ky konsultim formal bëhet edhe më i papranueshëm, veçanërisht, pas dhunës shtetërore barbare, gjakosjes dhe terrorizimit, si dhe rrëmbimeve e arrestimeve arbitrare dhe të paligjshme të studentëve dhe protestuesve. Shqipëria po përballet me një krizë të rëndë të lirive dhe të drejtave themelore, ndërsa dhuna ndaj të rinjve dhe represioni ndaj pluralizmit politik e bëjnë të domosdoshëm reagimin e institucioneve kushtetuese.

Përballë kësaj emergjence kushtetuese dhe kombëtare, përgjegjësia е institucionit të Presidentit të Republikës nuk mund të kufizohet në konsultime formale, por duhet të përqëndrohet në qëndrime të qarta, akte dhe veprime konkrete në mbrojtje të demokracisë, shtetit të së drejtës dhe lirive dhe të drejtave themelore të qytetarëve.

Fatkeqësisht, institucioni i Presidentit të Republikës nuk e ka përmbushur rolin e tij kushtetues, veçanërisht përballë dhunës  shtetërore ndaj studentëve, gjimnazistëve dhe qytetarëve që ushtrojnë të drejtën e tyre për të protestuar. Në këto rrethana, një konsultim formal për caktimin e datës së zgjedhjeve për organet e qeverisjes vendore është totalisht i pavend dhe i padobishëm.

Ajo që pritet prej jush është të përmbushni detyrimin kushtetues për caktimin e datës së zgjedhjeve vendore, pa e shndërruar këtë përgjegjësi në një procedurë formale, që mund të përdoret për qëllime propagandistike nga Qeveria dhe Kryeministri Edi Rama, të cilët janë edhe përgjegjësit kryesorë të krizës. Për këto arsye, ju bëj me dije se nuk do të marr pjesë në një konsultim formal me ju, të shkëputur nga urgjenca kushtetuese dhe kombëtare me të cilën përballet Shqipëria.

Ju faleminderit!

Klikoni këtu për të lexuar letrën e Blushit për Presidentin Begaj