Ministrja e Drejtësisë, Donika Gërvalla, ka deklaruar se do të jepte dorëheqje nga posti i saj nëse ky veprim do të ndihmonte në identifikimin dhe trajtimin më të shpejtë të përgjegjësive institucionale për rastin e vrasjes së Arlinda Zekajt.
Gjatë një deklarimi publik, Gërvalla tha se nuk e konsideron dorëheqjen si hap që do të sillte ndryshimin e kërkuar në këtë rast.
“Po të konsideroja që dorëheqja do të ishte mekanizmi për të cilin do të kontribuonim për një identifikim më të saktë, më të shpejtë për veprim ose mosveprim, unë do të kisha dhënë dorëheqje... Pikërisht e kundërta është. Qytetari e din se unë jam gjithmonë në anën e viktimave”.
“Nuk është momenti”, tha Gërvalla, raporton Telegrafi.
Edhe ministri i Punëve të Brendshme, Xhelal Sveçla, është deklaruar kundër dorëheqjes së tij, duke thënë se largimi nga detyra nuk do të kontribuonte në fuqizimin e grave dhe në mbrojtjen e të drejtave të tyre.
Në konferencën për media, Sveçla rikujtoi se para dhjetë vjetësh kishte dhënë dorëheqje nga një pozitë që mbante, edhe pse, sipas tij, nuk kishte pasur përgjegjësi për rastin e asaj kohe. Ai tha se atëherë kishte besuar se largimi i tij do të ndihmonte në përmirësimin e praktikave në atë fushë.
“Para 10 vitesh kam dhënë dorëheqje nga pozita... pa pasë kurrfarë përgjegjësie për rastin e atëhershëm, duke menduar se dorëheqja ime do të kontribuonte në përmirësimin e praktikave në atë fushë, tash unë nuk mendoj se dorëheqja jonë do të kontribuonte në fuqizimin e gruas, në të drejtat e saj se ne jemi të angazhuar qind për qind në atë pikë. Jam me protestuesit, e kuptoj indinjatën dhe mllefin e protestuesve”, tha ai.
Gërvalla dhe Sveçla janë përballur me thirrje për dorëheqje pas vrasjes së Arlinda Zekajt në Vitomiricë të Pejës. Rasti ka nxitur reagime publike dhe protesta, me kërkesa për përgjegjësi institucionale. /Telegrafi/
