Mundësi investimi, javën e ardhshme zhvillohet ankandi i obligacioneve 15-vjeçare

Ministria e Financave do të zhvillojë në fillim të muajit nëntor ankandin e ri të obligacioneve 15-vjeçare. Shuma e obligacioneve që do t’u ofrohen për blerje investitorëve është 2 miliardë lekë.

Në ankandin e fundit të këtyre instrumenteve, të zhvilluar në muajin gusht, yield-i uniform i pranuar i këtyre instrumenteve u rrit në 6.35%, nga 6.22% që kishte qenë në ankandin e mëparshëm të këtyre instrumenteve, në muajin qershor. Yield-i i këtyre instrumenteve aktualisht ka arritur nivelin më të lartë në dy vitet e fundit.

Kuponi indikativ i paraqitur para ankandit nga Ministria e Financave është në nivelin 6.45%, çka tregon një pritshmëri për rritje të mëtejshme të yield-eve nga ankandi i fundit.

Që prej tremujorit të dytë të këtij viti, yield-et e titujve afatgjatë kanë ndjekur një tendencë në rritje. Kjo mund të shpjegohet me një kërkesë disi më të ulët në ankande, por edhe me rritjen e inflacionit dhe pritshmëritë për rritjen e normave të interesit që shkaktoi kriza në Lindjen e Mesme.

Gjatë tremujorit të fundit, presionet mbi yield-et mund të nxiten edhe nga rritja e huamarrjes së qeverisë në tregun e brendshëm. Sipas kalendarit të huamarrjes të Ministrisë së Financave, shuma e programuar për t’u financuar në tregun e brendshëm, (duke përfshirë edhe rifinancimet e instrumenteve të maturuar) do të ketë vlerën 87 miliardë lekëve, në rritje me 9.4% krahasuar me shumën e planifikuar të huamarrjes për tremujorin e tretë dhe me 34% krahasuar me planin e huamarrjes në të njëjtën periudhë të një viti më parë.

Obligacionet 15-vjeçare janë instrumentet e dyta më afatgjata të borxhit të emetuara nga qeveria shqiptare, pas obligacioneve 20-vjeçare.

Obligacionet afatgjata janë një alternativë e mirë sidomos për investitorët institucionalë. Veçanërisht për shoqëritë që administrojnë fonde me horizont afatgjatë, si fondet private të pensionit, ato krijojnë mundësi për të pasuruar spektrin e titujve në portofole dhe për të rritur kthimet për anëtarët. Shtimi i instrumenteve të borxhit me maturim afatgjatë krijon më shumë premisa për të zhvilluar tregun dytësor të titujve, për t’i bërë këta tituj më likuidë.

Megjithatë, këto instrumente mund të jenë alternativë edhe për investitorët e vegjël që synojnë investime financiare afatgjata, me norma më të larta kthimi.

Individët apo subjektet e interesuara për të investuar mund të marrin pjesë në ankandet e obligacioneve nëpërmjet bankave tregtare të licencuara nga Autoriteti i Mbikëqyrjes Financiare (AMF) si shoqëri komisionere për investimin në tituj. Bankat e licencuara për këtë shërbim janë ABI Bank, BKT, Credins Bank, Fibank, Intesa Sanpaolo Bank, OTP Bank, Raiffeisen Bank, Tirana Bank dhe Union Bank. Shuma minimale e pjesëmarrjes në ankandet e obligacioneve është 300 mijë lekë.

Për shuma deri në 50 milionë lekë, investitorët mund të paraqiten në ankande me kërkesa konkurruese ose jo konkurruese, por çdo kërkesë vlera e së cilës kapërcen shumën 50 milionë lekë klasifikohet si kërkesë konkurruese pavarësisht subjektit pjesëmarrës në ankand./ E.Shehu