Policia e Lezhës ka identifikuar dhe shpallur në kërkim një 36-vjeçar, i dyshuar si njëri prej autorëve të një grabitjeje me armë zjarri, të ndodhur më 31 gusht 2021, në Rrugën e Kombit, në Mirditë. Sipas njoftimit të policisë, pas hetimeve të zhvilluara nën drejtimin e Prokurorisë së Lezhës, është identifikuar shtetasi me inicialet N. K., 36 vjeç, banues në Pukë, i dyshuar për përfshirje në ngjarjen ku shtetasit A. K. iu vodh një shumë parash nën kërcënimin e armës së zjarrit.

Në vijim të hetimeve, Gjykata e Lezhës ka caktuar ndaj 36-vjeçarit masën e sigurisë “Arrest në burg”. Policia bën me dije se është identifikuar edhe një person tjetër i dyshuar për përfshirje në këtë ngjarje, por për arsye hetimore nuk janë bërë publike të dhënat e tij.

Ndërkohë, vijon puna për kapjen e 36-vjeçarit, dokumentimin e plotë të ngjarjes dhe identifikimin e personave të tjerë që mund të kenë qenë të përfshirë.

Njoftimi i plotë:

DVP Lezhë/Identifikohet dhe shpallet në kërkim njëri nga autorët e dyshuar të vjedhjes me armë zjarri, në gusht të vitit 2021, në Rrugën e Kombit, në Mirditë.

Sektori për Hetimin e Krimeve të Rënda, në bashkëpunim me Seksionin për Hetimin e Krimeve të Pasurisë, të DVP Lezhë, si rezultat i hetimeve të thelluara në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Lezhë, ka bërë të mundur identifikimin e shtetasit N. K., si njëri prej autorëve të dyshuar të ngjarjes së ndodhur më datë 31.08.2021, në Rrugën e Kombit, në Mirditë, ku shtetasit A. K. iu vodh një shumë parash në kërcënimin e armës së zjarrit. 

Në vijim të hetimeve, Gjykata e Lezhës i ka caktuar shtetasit N. K., 36 vjeç, banues në Pukë, masën e sigurisë “Arrest në burg”. 

Gjithashtu, gjatë hetimeve është identifikuar edhe një shtetas tjetër, i dyshuar i përfshirë në këtë ngjarje, po për arsye hetimore, nuk bëhen me dije të dhëna të tjera.   

Vijon puna për kapjen e shtetasit N. K., për dokumentimin e plotë të ngjarjes dhe identifikimin e autorëve të tjerë të mundshëm.

Materialet procedurale iu referuan Prokurorisë, për veprime të mëtejshme.

/rtsh.al/