Familja e aktorit Bruce Willis ka vendosur që, pas vdekjes së tij, truri i tij të vihet në dispozicion të komunitetit shkencor për të ndihmuar studimet mbi demencën frontotemporale, sëmundjen neurodegjenerative nga e cila ai vuan. Vendimi është marrë nga bashkëshortja Emma Heming, pas konsultimeve me vajzat e tyre dhe me ish-bashkëshorten Demi Moore, dhe rrëfehet në librin e Heming, “The Unexpected Journey”, ku ajo përshkruan përballjen e familjes me sëmundjen.
Heming shpjegon se dhurimi i trurit është një zgjedhje emocionalisht e vështirë, por që mund të ketë rëndësi për kërkimin shkencor. Studiuesit, përmes analizimit të trurit, do të kenë mundësinë të vlerësojnë ndryshimet që ndodhin dhe të kuptojnë më mirë mënyrën e përparimit të demencës frontotemporale, me synimin për të ndihmuar në zhvillimin e trajtimeve më efektive. Ajo e ka përshkruar vendimin si “emocionalisht shkatërrues, por shkencërisht të nevojshëm”. Bisedat për këtë çështje janë zhvilluar edhe me vajzat e aktorit — Rumer, Scout dhe Tallulah — si dhe me Demi Moore, e cila vazhdon të jetë e pranishme në jetën e familjes.
Willis, 71 vjeç, u diagnostikua me demencë frontotemporale në vitin 2023. Më herët ai kishte bërë të ditur se vuante nga afazia, një çrregullim që ndikon në aftësinë për të komunikuar. Sëmundja është progresive dhe aktualisht nuk ka një kurë që ta ndalojë atë. Në muajin janar, Heming zbuloi edhe një tjetër aspekt të gjendjes së aktorit: anosognosinë, një çrregullim neurologjik që bën që i prekurit të mos e kuptojnë ose të mos dallojnë plotësisht sëmundjen e vet.
Familja ka ndarë me publikun sfidat e përditshme që sjell diagnoza, dhe vendimi për dhurimin e trurit synon që përvoja e Willis të kontribuojë në studimin e kësaj sëmundjeje dhe të përmirësojë mundësitë e trajtimit për pacientë të tjerë.