Pas fitores së lëvizjes studentore në zgjedhjet parlamentare në Serbi, studentë dhe aktivistë në Beograd kanë vijuar aksionet për pastrimin e hapësirave publike nga grafitet me përmbajtje nxitëse, fyese dhe përçarëse. Një ditë pasi u fshi një mbishkrim fyes ndaj shqiptarëve, ku përdorej termi përçmues “Shqiptar”, është mbuluar edhe grafiti me tekstin “Kur ushtria të kthehet në Kosovë”.
Aksioni për heqjen e këtij grafiti u zhvillua në rrugën Sremska, në qendër të Beogradit, dhe u realizua nga aktivisti Miodrag Kapor me bashkëpunëtorët e tij, njofton REL. Kapor bëri të ditur se aksionet kundër grafiteve po vazhdojnë edhe pas zgjedhjeve dhe se tani po zhvillohen “në kushte më të sigurta”.
Mbishkrimi “Kur ushtria të kthehet në Kosovë” ishte kritikuar prej kohësh për mesazhin e tij nacionalist dhe kërcënues. Në disa versione të tjera, parullës i është shtuar edhe një vazhdim me përmbajtje kërcënuese ndaj shqiptarëve. Pas heqjes së grafitit nuk munguan reagimet e ashpra në rrjetet sociale, ku disa përdorues fyejnë dhe kërcënojnë aktivistin Kapor për veprimin e tij.
Veprimet kundër grafiteve të urrejtjes po zhvillohen në një periudhë të rëndësishme politike për Serbinë, pasi lëvizja studentore fitoi në zgjedhjet parlamentare të 26 tetorit. Megjithatë, përkundër angazhimit për largimin e mesazheve të urrejtjes nga hapësirat publike, qëndrimi i lëvizjes studentore mbetet nacionalist: ajo vazhdon ta konsiderojë Kosovën pjesë të Serbisë.