Kryetari i Partisë Demokratike, Sali Berisha, ka njoftuar organizimin e një proteste kombëtare ditën e nesërme, në orën 12:00, në mbështetje të revoltës studentore. Përmes një deklarate publike, Berisha u ka bërë thirrje anëtarëve, mbështetësve të PD-së dhe qytetarëve nga mbarë vendi që të bëhen pjesë e protestës.
Berisha vlerësoi qëndresën e studentëve gjatë protestave të ditëve të fundit në Tiranë, duke e cilësuar atë si një akt guximi që ka fituar edhe vëmendjen dhe simpatinë ndërkombëtare.
Sipas tij, studentët dhe të rinjtë kanë ngritur zërin kundër korrupsionit, vjedhjes së zgjedhjeve dhe, siç u shpreh ai, mbrojtjes politike të aferave të qeverisë, duke përmendur posaçërisht Belinda Ballukun dhe kryeministrin Edi Rama.
Në deklaratën e tij, Berisha akuzoi kryeministrin për përpjekje për të njollosur protestën dhe për përdorimin e forcës ndaj demonstruesve. Ai foli për përdorim të armëve në kundërshtim me ligjin, dhunë ndaj protestuesve dhe trajtim të tyre në ambiente që i cilësoi si “salla torture”.
Berisha hodhi poshtë gjithashtu etiketimin e protestës si lëvizje ANTIFA, duke këmbëngulur se bëhet fjalë për një revoltë studentore kundër korrupsionit dhe qeverisë.
Protesta e thirrur nga PD-ja do të zhvillohet nesër, në orën 12:00, në kuadër të mobilizimit kombëtar në mbështetje të lëvizjes studentore.a.b
