Policia e Shtetit ka identifikuar 52 persona të dyshuar për përfshirje në veprime të dhunshme gjatë protestave të javëve të fundit, njoftoi kreu i Policisë, Skënder Hita. Materialet për këta persona i janë referuar Prokurorisë, ndërsa hetimet vijojnë për dokumentimin e plotë të rasteve të dhunës dhe për identifikimin e të tjerëve që mund të kenë marrë pjesë. Hita theksoi se identifikimet u kryen pavarësisht përpjekjeve të personave të dyshuar për të fshehur identitetin.
Strukturat e Hetimit të Krimeve kanë intensifikuar punën për dokumentimin e çdo veprimi të dhunshëm gjatë javëve të fundit, të cilat, sipas Hitas, kanë vënë në rrezik jetën e efektivëve të policisë dhe të qytetarëve. Ai njoftoi se vijon puna për identifikimin e të gjithë personave që kanë ushtruar dhunë dhe për përballjen me çdo veprim që cenon pronën publike dhe private.
Kreu i Policisë iu drejtua prindërve me apel që të tregojnë kujdes dhe të mos lejojnë përfshirjen e fëmijëve të mitur në protesta ku ka rrezik dhune. Ai kërkoi nga qytetarët të shmangin çdo akt dhune dhe të distancohen nga personat që përfshihen në veprime të tilla. “Dhuna nuk justifikohet dhe as do të mbrohet në emër të kësaj të drejte,” deklaroi Hita, duke nënvizuar vendosmërinë e policisë për të garantuar të drejtën e protestës ligjore dhe për të zbatuar parimin e proporcionalitetit ndaj atyre që ushtruar dhunë.
Hita vlerësoi gjithashtu rolin e mediave gjatë protestave, duke përmendur gazetarët, operatorët dhe fotoreporterët si pjesëtarë të një misioni fisnik. Ai kërkoi forcim të koordinimit në terren ndërmjet shërbimeve policore dhe punonjësve të medias, me qëllim lehtësimin e veprimtarisë gazetareske dhe sigurimin e jetës së personave të pranishëm në protesta. Materialet lidhur me personat e identifikuar janë tashmë në duart e Prokurorisë dhe hetimet përfundimtare vazhdojnë.