Shpresa për rihapjen e Lotarisë Amerikane (Green Card) për vitin 2027 është pezulluar sërish.
Gjykata e Apelit e Qarkut të Nëntë në SHBA ka bllokuar përkohësisht vendimin e një gjykate më të ulët, e cila kishte urdhëruar administratën amerikane të rihapte regjistrimet për programin e vizave të diversitetit.
Vendimi i marrë më 29 tetor i jep mundësi administratës Trump ta mbajë të pezulluar programin, ndërsa vijon shqyrtimi i ankimit të saj.
Gjykata e Apelit nuk e zgjidhi përfundimisht çështjen dhe as nuk miratoi vendimin e Departamentit të Shtetit për mosçeljen e regjistrimeve. Ajo argumentoi se subjekti që kishte ngritur padinë, një studio ligjore imigracioni, nuk kishte bazë të mjaftueshme ligjore për të kundërshtuar këtë vendim.
Çështja nisi pas padisë së ngritur nga studioja ligjore Red Eagle Law, e cila kërkoi që Departamenti i Shtetit të detyrohej të hapte regjistrimet për programin DV-2027.
Më 14 tetor, gjyqtarja federale Jinsook Ohta kishte vendosur në favor të paditësit, duke urdhëruar autoritetet amerikane të shpallnin periudhën e regjistrimit deri më 29 tetor dhe ta hapnin atë më 1 nëntor.
Lotaria Amerikane, e njohur si Diversity Visa Program, parashikon shpërndarjen e deri në 55 mijë vizave në vit për shtetasit e vendeve me nivele të ulëta emigrimi drejt Shteteve të Bashkuara.
Për momentin, regjistrimet për DV-2027 mbeten të mbyllura dhe nuk është shpallur një datë e re për hapjen e tyre. Procesi gjyqësor pritet të vijojë në Gjykatën e Apelit.
