Shpresat për hapjen e regjistrimeve të Lotarisë Amerikane (Green Card) për vitin 2027 janë shtyrë sërish, pasi një gjykatë federale e apelit në SHBA ka pezulluar përkohësisht vendimin që detyronte administratën amerikane të rifillonte procesin e aplikimeve.
Vendimi i Gjykatës së Apelit të Qarkut të Nëntë, i marrë më 29 tetor, i lejon administratës Trump ta mbajë të pezulluar programin, ndërkohë që vijon shqyrtimi i ankimit të saj.
Gjykata nuk ka dhënë një vendim përfundimtar mbi çështjen dhe as nuk ka miratuar në themel vendimin e Departamentit të Shtetit për të mos hapur regjistrimet. Në arsyetimin e saj, ajo vlerësoi se subjekti që kishte ngritur padinë, studioja ligjore e emigracionit Red Eagle Law, nuk kishte bazë të mjaftueshme ligjore për të kundërshtuar vendimin e autoriteteve amerikane.
Çështja nisi pas padisë së kësaj studioje, e cila kërkonte që Departamenti i Shtetit të detyrohej të hapte aplikimet për programin DV-2027. Më 14 tetor, gjyqtarja federale Jinsook Ohta kishte vendosur në favor të paditësit, duke urdhëruar autoritetet të shpallnin periudhën e regjistrimit deri më 29 tetor dhe ta nisnin procesin më 1 nëntor.
Programi i Vizave të Diversitetit, i njohur gjerësisht si Lotaria Amerikane, parashikon dhënien e deri në 55 mijë vizave çdo vit për shtetasit e vendeve me nivele të ulëta emigrimi drejt Shteteve të Bashkuara.
Për momentin, regjistrimet për DV-2027 mbeten të mbyllura dhe autoritetet nuk kanë njoftuar një datë të re për hapjen e aplikimeve. Procesi ligjor pritet të vijojë në Gjykatën e Apelit.