Kryeministri Edi Rama ka deklaruar se ka marrë mesazhe nga studentë që kërkojnë të mbeten anonimë nga frika e kërcënimeve, si dhe nga prindër që i janë drejtuar për ndihmë, pasi pretendojnë se fëmijët e tyre po përballen me presion për t’iu bashkuar protestave.
Gjatë një tryeze të Këshillit Kombëtar për të Drejtat dhe Mbrojtjen e Fëmijëve, Rama tha se nuk e kishte menduar se në Shqipëri frika për të shprehur mendimin e lirë do të vinte nga intimidimi i personave që pretendojnë se protestojnë për një vend më të mirë.
“Unë protestoj për ta bërë Shqipërinë më të mirë, dhe nëse ti nuk je dakord me mua, unë të intimidoj, të kërcënoj dhe të vendos para një zgjedhjeje, që është zgjedhje dramatike. Ose të jesh me mua, të mos vish në mësim, ose të jesh target i dhunës sime. Kam 10 mesazhe të studentësh që më kërkojnë të jenë anonim se kanë frikë. Kam 10 mesazhe të prindërve të këtyre studentëve që kërkojnë ndihmë sepse ndjehen të pafuqishëm”, deklaroi kryeministri.
Ai shtoi se, sipas mesazheve që ka marrë, fëmijët po përballen me kërcënime përmes një gjuhe që e cilësoi kriminale. Rama u bëri thirrje aktorëve të angazhuar në mbrojtjen e fëmijëve dhe familjeve që të ndihmojnë në përballimin e kësaj situate.
“Fëmijët e tyre janë të kërcënuar me një gjuhë që është kriminale. Ne presim një ndihmë nga të gjithë ju që jeni të angazhuar në një front të heshtur, por shumë të dobishëm për cilësinë e jetës dhe nevojën për mbështetje të fëmijëve dhe familjeve që nuk duhen lënë vetëm përballë këtyre prurjeve shumë djallëzore”, u shpreh Rama.