Mbi 47.9 milionë amerikanë kanë votuar tashmë në zgjedhjet e mesit të mandatit në SHBA, duke vendosur një rekord të ri të pjesëmarrjes së hershme. Sipas Laboratorit Zgjedhor të Universitetit të Floridës, deri tani janë regjistruar 47,922,669 vota të hershme në të gjithë vendin, duke tejkaluar rekordin e mëparshëm prej 45.9 milionë votash të vitit 2022. Përgjithësisht, rreth 226 milionë amerikanë janë regjistruar për të votuar, ndërsa dita zyrtare e zgjedhjeve do të jetë e martë, me mundësi për votim paraprak.
Rritja e pjesëmarrjes është veçanërisht e dukshme në shtetet e lëkundura, ku priten gara të forta mes demokratëve dhe republikanëve. Në Teksas, ku kandidati demokrat për Senat, James Tallarico, synon të përfundojë dominimin republikan prej tre dekadash, më shumë se 6 milionë qytetarë kishin votuar deri të mërkurën — një rritje prej rreth 50% krahasuar me zgjedhjet e vitit 2022. Pjesëmarrje të larta janë raportuar edhe në Karolinën e Veriut dhe Karolinën e Jugut. Në Kansas, ku senatori republikan po përballet me një garë të vështirë, votimi i parakohshëm gjatë javës së kaluar ishte pothuajse dy të tretat më i lartë se në zgjedhjet e vitit 2022.
Të dhënat tregojnë gjithashtu një epërsi të demokratëve në votimin e hershëm. Në shtetet ku monitorohet përkatësia politike e votuesve, rreth 44% e atyre që kanë votuar deri më tani identifikohen si demokratë, kundrejt 31% republikanë dhe 25% votues të pavarur ose mbështetës të partive më të vogla. Raportohet gjithashtu rritje e pjesëmarrjes së votuesve afrikano-amerikanë dhe hispanikë në shtetet që publikojnë këto të dhëna.
Megjithatë, ekspertët paralajmërojnë se shifrat e votimit të hershëm nuk mund të konsiderohen si një parashikim i rezultatit përfundimtar. Përkatësia partiake e votuesve nuk tregon domosdoshmërisht për cilin kandidat kanë votuar, dhe miliona amerikanë pritet të votojnë në ditën zyrtare. Në zgjedhjet e mëparshme republikët kanë pasur prirjen të votojnë kryesisht ditën e zgjedhjeve, ndaj epërsia e demokratëve në votimin e parakohshëm nuk do të reflektohet domosdoshmërisht në rezultatin përfundimtar. Gjithashtu, rritja e votave të hershme nuk nënkupton automatikisht një rritje të pjesëmarrjes së përgjithshme.