Një aksident tragjik në autostradën A1 në Itali i ka marrë jetën 20-vjeçarit Thomas Qirjaj, me origjinë shqiptare, banues në Caorso të provincës së Piacenzës.
I riu, i cili në dhjetor do të mbushte 21 vjeç, u përplas nga një fuoristradë në orët e para të së premtes, më 30 tetor, në zonën e Melegnano-s, në drejtim të San Giuliano Milanese.
Sipas mediave italiane, Thomas po udhëtonte me katër miq me një automjet tip Volvo, me targa zvicerane. Pasi kaluan barrierën e autostradës në Melegnano, makina nisi të humbiste kontrollin dhe përfundoi duke u përplasur me ndarësen e korsive. Ende nuk është përcaktuar nëse shkak ishte një defekt teknik apo një aksident i ndodhur pa përfshirjen e mjeteve të tjera.
Pas përplasjes, 20-vjeçari zbriti nga makina për të vendosur trekëndëshin e sinjalizimit në rrugë. Në atë moment u godit nga një fuoristradë që drejtohej nga një 25-vjeçar nga Modena, i cili, sipas rindërtimit paraprak, nuk e kishte vënë re praninë e të riut në karrexhatë deri në momentin e fundit.
Në vendngjarje mbërritën menjëherë ambulancat dhe ekipet e emergjencës. Gjendja e të riut ishte tepër e rëndë për shkak të dëmtimeve të marra nga përplasja me fuoristradën dhe rënia në asfalt.
Thomas u transportua me urgjencë në spitalin Predabissi, por ndërroi jetë pavarësisht përpjekjeve të mjekëve për ta shpëtuar.
Katër miqtë që udhëtonin me të nuk pësuan dëmtime të rënda.
Lajmi për vdekjen e të riut ka tronditur komunitetin e Caorso-s, ku Thomas jetonte me prindërit. Ai kishte lindur në Piacenza, në një familje me origjinë shqiptare, dhe ishte fëmijë i vetëm.
Kryetarja e bashkisë së Caorso-s, Roberta Battaglia, shprehu dhimbjen për humbjen e tij dhe solidaritetin me familjen.
“Lajmi për ndarjen e tij nga jeta mbërriti papritur dhe ishte dramatik. Ishte një djalë që e kam parë të rritet dhe që ishte integruar shumë mirë në jetën e komunitetit. Njoh edhe familjen, nënën që punon në fabrikë dhe babanë që punon në Zvicër”, deklaroi ajo.
Në emër të administratës dhe gjithë komunitetit, kryebashkiakja shprehu ngushëllimet për prindërit e Thomasit. Ajo, e cila është edhe mësuese, përcolli gjithashtu dhimbjen e komunitetit shkollor.
Për ngjarjen po hetojnë Policia Rrugore e Guardamiglio-s dhe Prokuroria e Lodit. Autoritetet do të rindërtojnë me hollësi dinamikën e aksidentit dhe do të kryejnë analizat toksikologjike ndaj drejtuesit të fuoristradës, sipas procedurave që ndiqen në raste të tilla.
Hetimet pritet të sqarojnë rrethanat e përplasjes fillestare të Volvo-s me ndarësen e autostradës dhe momentin kur Thomas u godit nga automjeti tjetër.
