Shefi i Mossad-it Roman Gofman
Agjencia izraelite e inteligjencës, Mossad, pritet t’i bashkohet hetimit mbi pretendimet se Katari u përpoq të ndikonte në zgjedhjet parlamentare të vendit përmes përdorimit të dhjetëra milionë shekelëve, pasi agjencia e sigurisë së brendshme, Shin Bet, kërkoi ndihmën e saj.
Mossadi do të ndihmojë në shqyrtimin e aspekteve të çështjes që bien në juridiksionin e tij, veçanërisht nëse qeveri të huaja janë përfshirë në operacionet e dyshuara të ndikimit. Shin Bet kishte siguruar informacione inteligjence mbi mundësinë e transfertave të paligjshme të parave edhe përpara zgjedhjeve, në kuadër të përgjegjësisë së tij për identifikimin dhe parandalimin e kërcënimeve ndaj sigurisë kombëtare.
Hetimi përqendrohet te përpjekjet e dyshuara për të ndikuar te votuesit dhe jo te pretendimet për manipulim të fletëvotimeve apo parregullsi gjatë numërimit të votave. Katari dhe Turqia, dy vendet në qendër të hetimit, i kanë mohuar të dyja çdo përfshirje.
Zëdhënësi i Ministrisë së Jashtme të Katarit, Majed Al-Ansari, i hodhi poshtë akuzat të enjten, duke deklaruar:
“Ne i hedhim poshtë pretendimet e bëra nga disa politikanë izraelitë dhe kontaktet e tyre në media, të cilët kanë nisur një tjetër fushatë dezinformimi, me synimin për ta përfshirë Katarin në mosmarrëveshjet politike të Izraelit pas zgjedhjeve të kësaj jave.
“Na akuzojnë se kemi blerë Netanyahun, të majtën dhe tani edhe votën arabe. Nëse të gjitha këto akuza do të ishin të vërteta, Katari me sa duket do të zotëronte të gjithë Izraelin”.
Kreu i Shin Bet-it, David Zini, Kryeministri i Katarit, Al Thani, dhe gjyqtari i Gjykatës Supreme, Noam Sohlberg
Edhe Turqia hodhi poshtë çdo sugjerim se kishte ndërhyrë në zgjedhjet izraelite.
“Pretendimet që po qarkullojnë në disa media dhe në rrjetet sociale janë plotësisht të pabazuara”, deklaroi Ankaraja. “Këto akuza janë pjesë e një fushate të qëllimshme dhe flagrante dezinformimi, që synon manipulimin e opinionit publik”.
Polemika nisi pas një letre të dërguar nga kryetari i Komisionit Qendror të Zgjedhjeve, gjyqtari i Gjykatës së Lartë, Noam Sohlberg, drejtuar kreut të Shin Bet, David Zini, ku kërkohej hetim mbi ndërhyrjen e dyshuar të aktorëve të huaj.
“Integriteti i zgjedhjeve qëndron në zemër të demokracisë”, shkroi Sohlberg.
Megjithëse theksoi se nuk mund ta vlerësonte personalisht përmbajtjen e pretendimeve, gjyqtari tha se mundësia e përfshirjes së aktorëve të huaj e bënte të domosdoshëm një hetim të plotë.
“Duke qenë se këto dyshime kanë të bëjnë me aktorë të huaj, ekziston detyrimi për t’i hetuar ato në mënyrë të plotë, me qëllim mbrojtjen e integritetit të zgjedhjeve për Knessetin dhe parandalimin e veprimtarive të paligjshme që synojnë të minojnë sistemin demokratik dhe të kryejnë akte subversive”, shkroi ai.
Letra e shtyu deputetin e partisë Yesh Atid, Vladimir Beliak, të kërkonte mbledhjen e kryesisë së Komisionit Qendror të Zgjedhjeve dhe paraqitjen përpara saj të provave mbi të cilat Sohlberg kishte mbështetur vendimin për t’i kërkuar Shin Bet të niste hetimin.
Dean Livne, drejtori i përgjithshëm në detyrë i komisionit, u përgjigj në emër të Sohlberg, duke theksuar se pretendimet që po hetoheshin nuk nënkuptonin se vetë procesi zgjedhor ishte komprometuar.
“Zgjedhjet për Knessetin u zhvilluan në përputhje me ligjin. Integriteti i votimit në qendrat e votimit u garantua në mënyrë rigoroze dhe, sipas njohurive tona, nuk ka asnjë bazë për pretendimet për shkelje sistematike të integritetit të zgjedhjeve”, deklaroi Livne.
Ai shtoi se deklaratat e bëra nga komisioneri i Policisë së Izraelit dhe drejtori i Shin Bet gjatë ditës së zgjedhjeve dhe më pas e përforconin këtë vlerësim.
