Shtetet e Bashkuara të Amerikës kanë miratuar shitjen e 500 raketave Patriot për Ukrainën, municione shumë të nevojshme këto për mbrojtjen kundër sulmeve ajrore gjithnjë e më të intensifikuara të Rusisë.
Departamenti Amerikan i Shtetit bëri të ditur se raketat do të kushtojnë 2.1 miliardë dollarë dhe se do të financohen tërësisht nga aleatët e Ukrainës.
Në deklaratën e publikuar të premten, Departamenti Amerikan i Shtetit tha: “Shitja do të mbështesë objektivat e politikës së jashtme dhe sigurisë kombëtare të Shteteve të Bashkuara, duke përmirësuar sigurinë e një vendi partner, i cili përbën një faktor stabiliteti politik dhe ekonomik në Evropë.
Ukraina do ta financojë këtë blerje përmes donacioneve nga Kanadaja, Gjermania dhe Norvegjia, nëpërmjet programit JUMPSTART, si dhe nga fondet kombëtare të financuara nga huaja e Bashkimit Evropian për mbështetjen e Ukrainës”.
Presidenti ukrainas, Volodymyr Zelensky, u ka kërkuar vazhdimisht Shteteve të Bashkuara që të përshpejtojnë dërgesat e sistemeve Patriot, të cilat janë e vetmja armë efektive për të rrëzuar raketat balistike vdekjeprurëse të Rusisë.
